मुंबई : राज्य प्रशासनाचे मुख्यालय असलेल्या मंत्रालयात दूषित पाणीपुरवठ्यामुळे शेकडो अधिकारी आणि कर्मचारी आजारी पडल्याची गंभीर घटना समोर आली आहे. गेल्या तीन ते चार दिवसांपासून मंत्रालयाच्या मुख्य इमारतीत दूषित पाण्याचा पुरवठा होत असल्याची तक्रार कर्मचाऱ्यांनी केली असून त्यामुळे उलट्या, जुलाब, पोटदुखी आणि ताप यांसारख्या त्रासांनी अनेक कर्मचारी बाधित झाले आहेत. गुरुवारी अचानक मोठ्या संख्येने कर्मचारी अस्वस्थ झाल्याने मंत्रालयातील दवाखान्यात उपचारासाठी मोठी गर्दी झाली. रुग्णांची संख्या वाढल्याने काही कर्मचाऱ्यांना पुढील उपचारासाठी सेंट जॉर्ज रुग्णालयात दाखल करण्यात आले. या घटनेमुळे मंत्रालयातील आरोग्य व्यवस्थेवर ताण निर्माण झाला असून कर्मचाऱ्यांमध्ये चिंता आणि भीतीचे वातावरण आहे. प्राथमिक माहितीनुसार, मंत्रालयाला पाणीपुरवठा करणाऱ्या मुख्य जलसाठा टाकीत पावसाचे दूषित पाणी मिसळल्यामुळे हा प्रकार घडल्याचा संशय व्यक्त केला जात आहे. या पार्श्वभूमीवर प्रशासनाने खबरदारीचा उपाय म्हणून पाण्याचे नमुने तातडीने प्रयोगशाळेत तपासणीसाठी पाठवले आहेत. तपासणी अहवालानंतर दूषित पाण्याचे नेमके कारण स्पष्ट होणार असून त्यानुसार पुढील आवश्यक उपाययोजना करण्यात येणार आहेत. दरम्यान, संबंधित यंत्रणांनी परिस्थितीवर लक्ष ठेवले असून कर्मचाऱ्यांच्या आरोग्याचीही सातत्याने पाहणी केली जात आहे.
दूषित पाणीपुरवठ्यामुळे मंत्रालयातील कर्मचाऱ्यांवर स्वतःच्या खर्चाने पिण्याचे पाणी विकत घेण्याची वेळ आली आहे. सुरक्षित पाण्याअभावी अनेक कर्मचारी बाटलीबंद पाण्याचा वापर करत असून काही विभागांमधील तब्बल ७० ते ७५ टक्के कर्मचारी या त्रासामुळे आजारी असल्याची माहिती समोर आली आहे. या घटनेमुळे मंत्रालयातील कामकाजावरही परिणाम होण्याची शक्यता व्यक्त केली जात आहे. सध्या राज्य विधिमंडळाचे पावसाळी अधिवेशन सुरू असल्याने या प्रकरणाचे पडसाद सभागृहातही उमटले. विरोधी पक्षाच्या आमदारांनी आणि लोकप्रतिनिधींनी हा मुद्दा उपस्थित करत सरकारचे लक्ष वेधले. “राज्याचा कारभार चालवणाऱ्या मंत्रालयातच अधिकारी आणि कर्मचाऱ्यांना शुद्ध पिण्याचे पाणी मिळत नसेल, तर सर्वसामान्य नागरिकांची परिस्थिती काय असेल?” असा सवाल उपस्थित करत या प्रकरणाची सखोल चौकशी करण्याची आणि दोषींवर कठोर कारवाई करण्याची मागणी करण्यात आली. तसेच मंत्रालयातील पाणीपुरवठा व्यवस्था तातडीने सुरळीत करण्याबरोबरच अशा घटना भविष्यात पुन्हा घडू नयेत यासाठी कायमस्वरूपी उपाययोजना करण्याची गरजही व्यक्त करण्यात आली. प्रयोगशाळेच्या अहवालानंतर या प्रकरणातील नेमके कारण स्पष्ट होणार असले तरी, कर्मचाऱ्यांच्या आरोग्याशी संबंधित या गंभीर प्रकारामुळे प्रशासनाच्या पाणीपुरवठा व्यवस्थेवर प्रश्नचिन्ह निर्माण झाले आहे.
