मुंबई : भारतातील आघाडीच्या ऑन-डिमांड सुविधा प्लॅटफॉर्म स्विगीने रात्री उशिरापर्यंत काम करणाऱ्या व्यावसायिकांसाठी ‘लेट नाईट ईट्स’ ही नवी सेवा सुरू केली आहे. जागतिक वेळेनुसार काम करणारे कर्मचारी, रात्रपाळीतील व्यावसायिक तसेच वाढीव कामाचे तास असणाऱ्या कर्मचाऱ्यांच्या गरजा लक्षात घेऊन सुरू करण्यात आलेली ही सेवा देशातील ३० प्रमुख शहरांमधील ४ हजारांहून अधिक कार्यालयीन ठिकाणे आणि ३० हजारांपेक्षा अधिक रेस्टॉरंट्समध्ये उपलब्ध असणार आहे. या सुविधेद्वारे ग्राहकांना रात्री १० ते पहाटे ५ वाजेपर्यंत निवडक खाद्यपदार्थ, आकर्षक सवलती, जलद वितरण सेवा आणि ‘२ एएम क्लब’चे विशेष लाभ मिळणार आहेत. या उपक्रमात बर्गर किंग, डॉमिनोज पिझ्झा, मॅकडोनाल्ड्स, केएफसी आणि सबवे यांसारख्या लोकप्रिय खाद्य ब्रँड्सचे पदार्थ उपलब्ध करून देण्यात आले आहेत. याशिवाय ‘डेस्कईट्स’ या संकल्पनेअंतर्गत कार्यालयात सहज खाता येतील असे रोल्स, रॅप्स, हेल्दी बाउल्स, सॅलड्स, कॉफी, चहा, मिल्कशेक्स, फ्रेंच फ्राईज, स्नॅक्स, डेझर्ट्स आणि समूहासाठी पिझ्झा अशा विविध पर्यायांचाही समावेश करण्यात आला आहे. रात्री उशिरापर्यंत काम करणाऱ्या कर्मचाऱ्यांना सोयीस्कर, जलद आणि परवडणारी खाद्यसेवा उपलब्ध करून देणे हा या उपक्रमामागील मुख्य उद्देश असल्याचे कंपनीने स्पष्ट केले आहे.
स्विगीने जाहीर केलेल्या आकडेवारीनुसार, कार्यालयीन परिसरातील सुमारे २५ टक्के कर्मचारी रात्री १० नंतर कार्यालयातूनच अन्नाची ऑर्डर देतात. विशेष म्हणजे भुवनेश्वर, गोवा, कोची, लखनौ, विशाखापट्टणम आणि अहमदाबाद यांसारख्या टियर-२ शहरांमध्ये रात्री उशिरा दिल्या जाणाऱ्या खाद्यपदार्थांच्या ऑर्डर्समध्ये दुहेरी अंकांची वाढ नोंदविण्यात आली आहे. तसेच कार्यालयीन परिसरांना सेवा देणाऱ्या एक तृतीयांशपेक्षा अधिक रेस्टॉरंट्स रात्री १० ते सकाळी ६ वाजेपर्यंत ऑर्डर्स स्वीकारत असल्याचेही कंपनीने नमूद केले आहे. स्विगीचे फूड स्ट्रॅटेजी, ग्राहक अनुभव आणि नवीन उपक्रम विभागाचे उपाध्यक्ष दीपक मालू यांनी सांगितले की, कार्यसंस्कृती झपाट्याने बदलत असून जागतिक वेळेनुसार काम करणाऱ्या कर्मचाऱ्यांची संख्या सातत्याने वाढत आहे. त्यामुळे रात्री उशिरा कार्यालयातून दिल्या जाणाऱ्या ऑर्डर्समध्येही लक्षणीय वाढ होत आहे. या वाढत्या मागणीची पूर्तता करण्यासाठी अधिक विश्वासार्ह, जलद आणि किफायतशीर फूड डिलिव्हरी सेवा उपलब्ध करून देण्याच्या उद्देशाने ‘लेट नाईट ईट्स’ सुरू करण्यात आली आहे. आगामी काळात या सेवेत अधिक रेस्टॉरंट्स आणि कार्यालयीन केंद्रांचा समावेश करून तिचा विस्तार करण्यात येणार असल्याचेही त्यांनी सांगितले.
