मुंबई : अन्न व औषध प्रशासनाने (FDA) राज्यभर सुरू केलेल्या विशेष मोहिमेअंतर्गत भ्रामक आणि नियमबाह्य सौंदर्य प्रसाधनांविरोधात मोठी कारवाई केली आहे. मुंबईतील क्रॉफर्ड मार्केट, कांदिवली तसेच सातारा जिल्ह्यातील कराड येथे करण्यात आलेल्या छापेमारीत एकूण ३४.६२ लाख रुपयांचा सौंदर्य प्रसाधनांचा साठा जप्त करण्यात आला आहे. अन्नपदार्थांमधील तसेच दैनंदिन वापरातील वस्तूंमधील भेसळ रोखण्यासाठी प्रशासनाकडून सातत्याने तपासण्या केल्या जात असून, याच मोहिमेअंतर्गत ही कारवाई करण्यात आली. मोठ्या प्रमाणावर रासायनिक घटकांचा वापर करून तयार करण्यात येणाऱ्या उत्पादनांमुळे ग्राहकांच्या आरोग्यावर गंभीर परिणाम होऊ शकतात. त्यामुळे सार्वजनिक आरोग्याशी संबंधित कोणत्याही प्रकारच्या गैरप्रकारांविरोधात प्रशासनाने कठोर भूमिका घेतली आहे. अन्न व औषध प्रशासनाचे आयुक्त तुकाराम मुंढे यांनी सांगितले की, जनतेच्या आरोग्याशी तडजोड करणाऱ्या, दिशाभूल करणाऱ्या किंवा नियमांचे उल्लंघन करणाऱ्या उत्पादनांबाबत शून्य सहनशीलतेचे धोरण अवलंबले जात आहे. अशा प्रकारची उत्पादने तयार करणे, साठवणे किंवा विक्री करणे कोणत्याही परिस्थितीत खपवून घेतले जाणार नाही, असा इशाराही त्यांनी दिला.
एफडीएच्या अधिकाऱ्यांनी १३ जून रोजी मुंबईतील क्रॉफर्ड मार्केट परिसरातील एम/एस ब्युटी सेंटर येथे तपासणी केली असता काही सौंदर्य प्रसाधनांमध्ये आवश्यक वैज्ञानिक पडताळणीचा अभाव असल्याचे आढळून आले. तसेच उत्पादनांबाबत करण्यात आलेले काही दावे दिशाभूल करणारे असल्याचा संशय व्यक्त करण्यात आला. शरीराच्या विशिष्ट अवयवांची वाढ करणे, चरबी कमी करणे किंवा शरीराचा आकार बदलणे यांसारखे दावे करणाऱ्या विविध उत्पादनांचा यामध्ये समावेश होता. संबंधित उत्पादनांवरील माहिती अपुरी आणि नियमांनुसार नसल्याचे निदर्शनास आल्यानंतर सुमारे १.२० लाख रुपयांचा साठा जप्त करण्यात आला. याशिवाय कांदिवलीतील एका संस्थेवर कारवाई करत परवानगीविना साठवून ठेवलेली सौंदर्य प्रसाधने, कच्चा माल आणि उत्पादन प्रक्रियेसाठी वापरली जाणारी यंत्रसामग्री असा ३.९६ लाख रुपयांचा मुद्देमाल जप्त करण्यात आला. दरम्यान, सातारा जिल्ह्यातील कराड येथे झालेल्या तपासणीत ‘मिसब्रँडेड’ सौंदर्य प्रसाधनांचा तब्बल २९.४५ लाख रुपयांचा साठा प्रतिबंधित करण्यात आला. या सर्व प्रकरणांमध्ये संबंधितांविरोधात औषधे व सौंदर्य प्रसाधने अधिनियम, १९४० तसेच त्याअंतर्गत असलेल्या नियमांनुसार पुढील कायदेशीर कारवाई सुरू करण्यात आली आहे. ग्राहकांची फसवणूक रोखणे आणि सार्वजनिक आरोग्याचे संरक्षण करणे हा या मोहिमेचा मुख्य उद्देश असल्याचे प्रशासनाने स्पष्ट केले आहे.
