पालघर : पालघर हा सीमावर्ती जिल्हा असल्याने दादरा-नगर हवेली तसेच दीव-दमण या केंद्रशासित प्रदेशांतून कर चुकवून मद्य महाराष्ट्रात आणून त्याची अवैध विक्री करण्याचे प्रकार वारंवार उघडकीस येत असतात. काही प्रकरणांमध्ये बनावट मद्याचीही विक्री केली जात असल्याने राज्य उत्पादन शुल्क विभागावर अशा तस्करीला आळा घालण्याची मोठी जबाबदारी आहे. याच पार्श्वभूमीवर राज्य उत्पादन शुल्क विभागाच्या डहाणू कार्यालयाने आणि पालघर येथील भरारी पथकाने संयुक्त कारवाई करत अवैध मद्य तस्करीचा मोठा प्रकार उघड केला आहे. या कारवाईत तिघांविरुद्ध गुन्हा दाखल करण्यात आला असून सुमारे ३५ लाख रुपयांचा मुद्देमाल जप्त करण्यात आला आहे. जिल्ह्यालगत असलेल्या केंद्रशासित प्रदेशांतून होणारी मद्य तस्करी रोखण्यासाठी राज्य उत्पादन शुल्क विभागाचे डहाणू विभाग आणि पालघर येथील भरारी पथक सातत्याने गस्त घालत असते. नियमित गस्तीदरम्यान संशयास्पद हालचालींची माहिती मिळाल्यानंतर अधिकाऱ्यांनी विविध ठिकाणी सापळे रचून तपास सुरू केला. या मोहिमेत डहाणूचे निरीक्षक सुनील देशमुख, पालघर भरारी पथकाचे निरीक्षक अरुण चव्हाण, दुय्यम निरीक्षक आर. एस. शिंदे, विश्वजीत आभाळे, विकास आबनावे, अभिजीत मानकर आणि टी. व्ही. सावेकर यांचा सहभाग होता.
दहाळे, कासा (ता. डहाणू), बेहेडपाडा, वावर (ता. जव्हार) तसेच सोरळी बेहेडपाडा, वावर या भागांत दोन स्वतंत्र पथकांनी कारवाई केली. तपासादरम्यान बोलेरो पिकअप (एमएच ४८ सीबी १४४३), इको चारचाकी (एमएच ०५ बीएच ६६५८) आणि इनोव्हा कार (एमएच ०१ बीजे १४९५) या वाहनांमधून अवैध मद्याची वाहतूक होत असल्याचे निदर्शनास आले. जप्त करण्यात आलेले मद्य दादरा-नगर हवेली आणि दीव-दमण परिसरातून महाराष्ट्रात कर चुकवून आणण्यात आले होते. या प्रकरणी तिघांविरुद्ध गुन्हा दाखल करण्यात आला असून पुढील तपास डहाणूचे निरीक्षक सुनील देशमुख, पालघर भरारी पथकाचे दुय्यम निरीक्षक अरुण चव्हाण आणि दुय्यम निरीक्षक विश्वजीत आभाळे करत आहेत. राज्य उत्पादन शुल्क विभागाचे आयुक्त प्रसाद सुर्वे, कोकण विभागाचे उपायुक्त प्रदीप पवार, पालघरचे अधीक्षक गणेश बारगजे आणि उपाधीक्षक अविनाश रणपिसे यांच्या मार्गदर्शनाखाली ही कारवाई करण्यात आली. या मोहिमेत विभागातील अनेक अधिकारी आणि जवानांनी सहभाग घेतला. सीमावर्ती भागातून होणाऱ्या मद्य तस्करीविरोधात भविष्यातही अशाच कठोर कारवाया सुरू राहतील, असा इशारा राज्य उत्पादन शुल्क विभागाने दिला आहे.
