वृत्तसंस्था : गेल्या काही तासांपासून इंटरनेटवर “भारतात पुन्हा लॉकडाऊन लागणार का?” आणि “लॉकडाऊन न्यूज” असे शब्द मोठ्या प्रमाणावर सर्च केले जात आहेत. मध्य पूर्वेतील सुरू असलेला भीषण संघर्ष आणि कोरोना महामारीला ६ वर्षे पूर्ण होत असतानाच या चर्चांनी जोर धरला आहे. मात्र, केंद्र सरकारने अशा प्रकारच्या कोणत्याही लॉकडाऊनची घोषणा केलेली नाही. मग या अफवा नक्की पसरल्या तरी कुठून? पंतप्रधान नरेंद्र मोदी यांनी लोकसभा आणि राज्यसभेत मध्य पूर्वेतील युद्धावर भाष्य केले. यावेळी त्यांनी कोरोना काळातील आव्हानांची आठवण करून दिली. मोदी म्हणाले की, “ज्याप्रमाणे आपण कोरोना काळात एकजूट राहून संकटाचा सामना केला, तशीच एकजूट आताही दाखवण्याची गरज आहे.”
पंतप्रधानांनी स्पष्ट केले की, या युद्धामुळे जागतिक पुरवठा साखळी विस्कळीत झाली असून इंधन, खते आणि गॅसच्या किमतींवर परिणाम होत आहे. ही कठीण परिस्थिती दीर्घकाळ टिकू शकते, त्यामुळे देशवासियांनी प्रत्येक परिस्थितीसाठी तयार राहावे, असे आवाहन त्यांनी केले. त्यांच्या या ‘तयार राहा’ या विधानाचा चुकीचा अर्थ काढून सोशल मीडियावर लॉकडाऊनच्या अफवा पसरू लागल्या आहेत. २८ फेब्रुवारी रोजी इराणवर झालेल्या हल्ल्यानंतर मध्य पूर्वेतील तणाव शिगेला पोहोचला आहे. हॉर्मुझच्या सामुद्रधुनीतून होणारा व्यापार विस्कळीत झाल्याने जागतिक ऊर्जा संकट निर्माण झाले आहे. या संकटाचा सामना करण्यासाठी केंद्र सरकारने 7 विशेष अधिकार प्राप्त गटांची (Empowered Groups) स्थापना केली आहे. हे गट इंधन, खते आणि महागाई यावर नियंत्रण मिळवण्यासाठी रणनीती आखतील. २४ मार्च २०२० रोजी जेव्हा पहिला लॉकडाऊन लागला होता, तेव्हा देशात कोरोनाचे सुमारे ५०० रुग्ण होते. मात्र, २०२६ मध्ये परिस्थिती पूर्णपणे वेगळी आहे. भारतात सध्या कोरोना पूर्णपणे नियंत्रणात असून केवळ ७ सक्रिय रुग्ण आहेत. त्यामुळे आरोग्यविषयक कारणास्तव लॉकडाऊन लागण्याची कोणतीही शक्यता नाही. सध्याचे संकट हे आरोग्यविषयक नसून आर्थिक आणि भौगोलिक आहे. थोडक्यात सांगायचे तर, सरकार कोणत्याही प्रकारचे निर्बंध लादण्याच्या विचारात नाही. केवळ युद्धाचे जागतिक परिणाम कमी करण्यासाठी प्रशासकीय पातळीवर तयारी सुरू आहे. त्यामुळे नागरिकांनी घाबरून न जाता अफवांवर विश्वास ठेवू नये.
