सातारा : डॉक्टरांची एक चूक एखाद्या व्यक्तीसह तिच्या कुटुंबाचं आयुष्य कसं उद्ध्वस्त करते याचं दुर्दैवी उदाहरण साताऱ्यात पाहायला मिळालं. साताऱ्यातील गौतमी शशिकांत पाटील यांनी २ महिन्यांपूर्वी सोनवडे सरकारी दवाखान्यात कुटुंब नियोजनाच्या शस्त्रक्रियेचा निर्णय घेतला होता. मात्र, चुकीच्या शस्त्रक्रियेमुळे आज गौतमी या आता मृत्यूशी झुंज देत आहेत. अवघ्या १०-१५ मिनिटांची शस्त्रक्रिया २-३ तास चालली आणि गौतमीचा घात झाला. शस्त्रक्रियेत झालेल्या चुकीमुळे गौतमीच्या आतड्यांना होल पडून इन्फेक्शन झालं आणि हे इन्फेक्शन किडनी आणि लिव्हरपर्यंत पोहोचलं. अतिशय बेजबाबदार डॉक्टर आणि रुग्णालयामुळे एक कुटुंब अक्षरश: उद्ध्वस्त झालं. या संपूर्ण घटनेची बातमी समजल्यानंतर राज्याचे मुख्यमंत्री एकनाथ शिंदे आणि त्यांचे विशेष कार्यकारी अधिकारी मंगेश चिवटे यांनी दखल घेतली आहे. त्यांनी आश्वासन दिलंय की, आम्ही योग्य ती कारवाई करु आणि सर्वोतोपरी मदत करण्याचा प्रयत्न देखील करणार असल्याचं त्यांनी सांगितलं आहे. तर पालकमंत्री शंभूराज देसाई या प्रकरणात स्वत: लक्ष घालणार असल्याचं सांगण्यात आलं आहे.
सोनवडे रुग्णालयाचे डॉ. ननावरे, डॉ. डुबल यांच्या बेजबाबदारपणामुळे हा संपूर्ण प्रकार घडला. मोठी गडबड झाली हे लक्षात येताच सरकारी रुग्णवाहिकेतून गौतमी यांना पाटणला सोनोग्राफीसाठी नेण्यात आलं. तेथील डॉक्टरांनी गौतमीचे फुगलेले पोट पाहून कराडला जायला सांगितले. कराडच्या कॉटेज कुटीर हॉस्पिटलमध्येही केवळ पेनकिलर देण्यात आलं, त्यावरही फरक पडला नाही. गौतमी अधिक अस्वस्थ झाल्या. ऑक्सिजन लेव्हल कमी झाली, व्हेंटिलेटरची गरज पडली आणि त्यांवी सातारा सिव्हिल रुग्णालयात दाखल करण्यात आलं. २ दिवस गेले अन् तपासणीतून धक्कादायक माहिती समोर आली. गौतमी यांची साताऱ्यात केलेली कुटुंब नियोजनाच्या शस्त्रक्रियेत गडबड झाली होती. २-४ टाक्यांच्या शस्त्रक्रियेऐवजी गौतमीच्या पोटाला २६ टाके पडलेत शिवाय आतड्याला होल अन् संपूर्ण पोटात इन्फेक्शन झालं होतं हे स्पष्ट झालं. हे सत्य समोर आल्यानंतर पाटील कुटुंबियांच्या पायाखालची जमीन सरकली. आपल्या हसऱ्या-खेळत्या आईला असा विनाकरण भोगावा लागणारा हा त्रास एका कुटुंबासाठी किती वेदनादायी असेल याची कल्पनाही करता येणार नाही. ”ज्या वयात मुलीने आईचा त्रास पाहायचा. त्या वयात मला माझ्या मुलीच्या वेदना पाहायला लागणं किती दुर्दैवी आहे”, असं सांगताना गौतमीच्या आईच्या डोळ्यात अश्रू तरळत होते. गौतमी यांना देखील ५ आणि ६ वर्षांची दोन मुलं आहेत. पण गेल्या २ महिन्यांच्या काळात अंथरुणाला खिळून असलेल्या गौतमी यांना साधं आपल्या मुलांनाही भेटता आलं नाही. अन् आता आपल्या आईला अशा अवस्थेत पाहून लेकरं हिरमुसली आहेत. आपल्या बायकोला अशा अवस्थेत पाहून नवरा, कुटुंबिय, लेकरं हुमसून रडत असतात.
”माझ्या बहिणीला मरणाच्या दारात पाहत आहोत, विचार केला तरी अंगावर काटा येतो. तिची ही अवस्था पाहून आता मी देखील पुढे कुटुंब नियोजनाची शस्त्रक्रिया न करण्याच्याच निर्णयावर येऊन पोहोचली आहे”, असं गौतमी यांची बहीण आम्रपाली कांबळेंनी सांगितलं. तर, ”माझ्या सुनेला झालेल्या या त्रासामुळे आमचं अख्खं घर हादरलं आहे. सगळे उपचारांसाठी सुनेसह मुंबईला गेले आहेत. आमचं कुटुंब अन् प्रपंच उघड्यावर पडला आहे”. अशी भावना गौतमीचे सासरे रामचंद्र पाटलांनी व्यक्त केल्या आहेत.
”माझ्या पत्नीसोबत जे झालं ते दुसऱ्या कुणाही सोबत होऊ नये. पण याच डॉक्टरांकडून आधीही काही रुग्णांच्या बाबतीत अशीच चूक झाली. पण तेव्हा कुणीही आवाज न उठवल्याने आज माझ्या पत्नीची ही अवस्था झाली. ते डॉक्टर आजही निर्दोष फिरत आहेत आणि आम्हाला न्याय हवा आहे”, असं गौतमीचे पती शशिकांत पाटील यांनी सांगितलं. स्वत: गौतमी पाटील या देखील न्याय मिळण्याची मागणी करत आहेत. ”दोन्ही डॉक्टरांचं निलंबन करून माझ्या कुटुंबालाही सरकारने याची नुकसान भरपाई देणं आवश्यक आहे”, गौतमी म्हणाल्या आहेत.
२० मेपासून आजपर्यंत हे कुटुंबं हा सगळा त्रास सहन करत आहे आणि चुका करणारे डॉक्टर मात्र आजही निर्दोष फिरत आहेत. गौतमी आणि त्यांचं कुटुंब हे फक्त न्यायाच्या प्रतिक्षेत आहे. पोटातलं संपूर्ण इन्फेक्शन काढण्यासाठी रुग्णालयाचा खर्च परवडत नसल्याने घरच्या घरीच गौतमीवर मशीन लावून उपचार सुरु आहेत. हे इन्फेक्शन पूर्णपणे निघण्यास अपयश आलं तर यात गौतमीच्या जगण्याची शाश्वतीही कमी होणार आहे. एक बेजबाबदार यंत्रणा एका कुटुंबाला वा व्यक्तीला मुळापासून उद्ध्वस्त करते याचं यापेक्षा दुर्दैवी उदाहरण दुसरं काय? सरकारने ह्यात गंभीरपणे लक्ष देणं, तातडीने संबंधित डॉक्टरांवर कडक कारवाई करणं, गौतमीला आर्थिक नुकसान भरपाईसह सर्वोत्तम उपचार देण्याची संपूर्ण सोय करणं हे ह्यात सर्वाधिक महत्वाचं काम आहे. गौतमी ह्या संकटातून सुखरुप बाहेर येतील अन् त्यांना न्याय मिळेल हिच अपेक्षा आहे.