वसई : मागील आठवड्यात झालेल्या अवकाळी पावसामुळे शेतकऱ्यांसह इतर व्यावसायिकांचे मोठे नुकसान झाले होते. त्याचे पंचनामे करण्याचे काम सुरू असून आतापर्यंत ३४७ नुकसान ग्रस्तांचे पंचनामे करण्यात आले आहेत.
वसई विरारच्या भागात मागील अवकाळी पावसाने धुमाकूळ घातला होता. यामुळे शेतकऱ्यांनी कापणी केलेले व कापणीसाठी तयार झालेल्या भात पिकांचे नुकसान झाले होते तर भाजीपाला, फळबागा यांनाही पावसाचा फटका बसला होता. तर दुसरीकडे किनारपट्टीच्या अर्नाळा, किल्लाबंदर, पाचूबंदर या भागात सुकविण्यासाठी ठेवलेली मासळी भिजून गेल्याने मच्छिमार बांधवांचे नुकसान झाले होते. अवकाळीने नुकसान झालेल्या नुकसानाचे पंचनामे करण्याचे काम वसईच्या तहसील विभागाने सुरू केले आहे. तलाठी, मंडळ अधिकारी व इतर महसूल कर्मचारी जागेवर जाऊन पंचनामे करीत आहेत. आतापर्यंत ३४७ नुकसानग्रस्तांचे पंचनामे पूर्ण झाले आहेत. तर ४५० इतक्या मच्छिमार यांच्या मासळीचे नुकसान झाले आहे त्यांची माहिती घेतली आहे असे वसईचे तहसीलदार डॉ. अविनाश कोष्टी यांनी सांगितले.