नाशिक : राज्य परिवहन महामंडळाच्या बस स्थानक परिसरात वाढत चाललेल्या अवैध खासगी प्रवासी वाहतुकीमुळे एसटीच्या प्रवासी संख्येत घट होत असून त्याचा थेट परिणाम महामंडळाच्या उत्पन्नावर होत आहे. या पार्श्वभूमीवर एसटी महामंडळाने बस स्थानकांच्या आवाराभोवती २०० मीटर परिसरात ‘नो पार्किंग झोन’ची कडक अंमलबजावणी करण्याचा निर्णय घेतला आहे. प्रवाशांना एसटी सेवेकडे वळवणे आणि महामंडळाचे उत्पन्न वाढवणे हा या मोहिमेचा मुख्य उद्देश आहे. या विशेष कारवाईअंतर्गत बस स्थानकांजवळ नियमांचे उल्लंघन करणाऱ्या खासगी प्रवासी वाहतूकदारांवर कारवाई सुरू करण्यात आली असून पहिल्या दोन दिवसांत १३ खासगी वाहनांवर दंडात्मक कारवाई करण्यात आली आहे. ही मोहीम १५ जूनपर्यंत सुरू राहणार आहे. राज्याचे परिवहनमंत्री प्रताप सरनाईक तसेच मुख्य सुरक्षा व दक्षता अधिकारी डॉ. प्रियंका नारनवरे यांच्या मार्गदर्शनाखाली ही मोहीम राबविण्यात येत आहे.
या अंतर्गत बस स्थानकांच्या २०० मीटर परिसरात अवैध प्रवासी वाहतूक करणाऱ्या वाहनांवर स्थानिक पोलीस आणि प्रादेशिक परिवहन कार्यालयाच्या सहकार्याने धडक कारवाई केली जात आहे. नाशिक जिल्ह्यात वरिष्ठ सुरक्षा व दक्षता अधिकारी भगवान घुगे आणि विभाग नियंत्रक सचिन क्षीरसागर यांच्या नेतृत्वाखाली सर्व आगारांमध्ये ही मोहीम सुरू आहे. विभागीय वाहतूक अधिकारी, आगार व्यवस्थापक, स्थानक प्रमुख आणि स्थानिक पोलीस यांचाही यात सहभाग आहे. शहर आणि ग्रामीण भागातील अनेक बस स्थानकांभोवती खासगी वाहने प्रवाशांना एसटी सेवेकडे जाण्यापासून परावृत्त करत असल्याच्या तक्रारी सातत्याने येत होत्या. या पार्श्वभूमीवर नाशिक विभागातील नवीन मध्यवर्ती बस स्थानक, मेळा बस स्थानक, महामार्ग बस स्थानक, नाशिकरोड, त्र्यंबकेश्वर, मनमाड, सिन्नर, मालेगाव, इगतपुरी, वणी, दिंडोरी, सुरगाणा यांसह विविध स्थानकांच्या परिसरात उच्च न्यायालयाच्या आदेशानुसार २०० मीटर नो पार्किंग झोनची प्रभावी अंमलबजावणी करण्यात येत आहे. या मोहिमेमुळे अवैध प्रवासी वाहतुकीला आळा बसून एसटीच्या प्रवासी संख्येत वाढ होण्याची अपेक्षा व्यक्त केली जात आहे.
