रत्नागिरी (आकांक्षा नार्वेकर) : रत्नागिरी जिल्ह्यात सतत भजन क्षेत्रातील एक चर्चेतील नाव तसेच गुहागर तालुक्यासह जिल्हयात मोठा शिष्यपरिवार असणारे श्री दत्त प्रासादिक भजन मंडळ, पालशेतचे भजनीबुवा श्री.महेश नरहर होळंब रा. पालशेत यांनी सामाजिक व सांस्कृतिक क्षेत्रात सामाजिक बांधिलकीच्या भावनेने समर्पितवृत्तीने भजनसेवेतून समाजप्रबोधनाचे जे कार्य केले आहे त्या कार्याच्या गौरवार्थ महाराष्ट्र जनता विकास प्रतिष्ठान कडून नगरपंचायत गुहागर येथे राज्यस्तरीय “सांस्कृतिक गौरव पुरस्कार-२०२२” हा पुरस्कार देऊन नुकतच संन्मानीत करण्यात आल. त्यावेळी माजी बांधकाम सभापती नगरपंचायत गुहागर श्री माधव साठले, महाराष्ट्र जनता विकास प्रतिष्ठानचे अध्यक्ष- डॉ.मनोज पाटील, संचालक-नितीन घरट, सेक्रेटरी-नवनीत पाटील अमोल वराडकर, क्षितीजा मोरे, अंकिता जोशी, आदी मान्यवर उपस्थित होते.
श्री. महेश होळंब हे भजन क्षेत्रातील अग्रगण्य नाव असलेले भजनसम्राट कै.चंद्रकांत बुवा कदम यांचे पटशिष्य कै.अनंत बुवा महाडिक(दाभोळ) यांचे शिष्य आहेत. कै.अनंत बुवा महाडिक यांचा संगीत भजन क्षेत्रात वेगळाच दबदबा होता. अनेक भजनी बुवा त्यांनी या जिल्ह्याला दिले आहेत. कै.अनंत बुवा महाडिक यांची भजनी कारकीर्द म्हणजे या रत्नागिरी जिल्हयाला संगीतभजनाच्या रुपात पडलेल एक गोड स्वप्न होत. अशा आपल्या गुरूच्या भजनी कारकीर्दीला भारुन त्यातून प्रेरणा घेऊन त्यांनी भजनसेवा करण्याचा प्रवास सुरु केला. गेली ३५ वर्षे सातत्याने संगीत भजन क्षेत्रात आपल्या कार्यकर्तुत्वाने ठसा उमटविण्याचा प्रांजळ प्रयत्न श्री. महेश होळंब बुवा यांनी केला आहे. रसिक मायबाप श्रोते प्रेक्षक वर्गाला मंत्रमुग्ध करणारा असा त्यांना आवाज लाभला आहे. आपल्या भजन सेवेच्या माध्यमातून लोक जागृती, मनोरंजन तसेच समाज प्रबोधानाचे कार्य ते सातत्याने करीत आहेत. त्यांनी अनेक जिल्हास्तरीय भजन स्पर्धेत सहभाग घेत कित्येकवेळा प्रथम क्रमांक पटकविले आहे. तसेच त्यांना वेळोवेळी पुरस्कार देत सन्मानित केले आहे. अनेक ठिकाणी त्यांनी स्पर्धात्मक कार्यक्रमात परीक्षक म्हणून काम पाहिले आहे. त्याचबरोबर त्यांचे शिष्यही या भजनक्षेत्रात नेत्रदीपक यश संपादन करताना दिसत आहेत.
