मुंबई : मुंबईसह आसपासच्या भागात वाढलेल्या प्रचंड उष्णतेचा परिणाम आता पाणीपुरवठ्यावरही दिसू लागला आहे. तापमानातील सातत्याने होत असलेल्या वाढीमुळे धरणांमधील पाण्याचे बाष्पीभवन वेगाने होत असून, त्यामुळे उपलब्ध पाणीसाठ्यात लक्षणीय घट झाली आहे. मुंबई शहराला पाणीपुरवठा करणाऱ्या धरणांमध्ये पाणी कमी होत असल्याने प्रशासनाने खबरदारीचा उपाय म्हणून पाणी कपातीचा प्रस्ताव तयार केला आहे. सूत्रांच्या माहितीनुसार, १ मेपासून शहरात १० टक्के पाणी कपात लागू करण्याचा प्रस्ताव पाणी विभागाने आयुक्तांकडे मंजुरीसाठी पाठवला आहे.
दरम्यान, हवामान खात्याने यंदाच्या पावसाबाबत व्यक्त केलेला अंदाजही चिंताजनक आहे. येत्या पावसाळ्यात सरासरीपेक्षा कमी पाऊस होण्याची शक्यता वर्तवण्यात आली आहे. त्यामुळे आधीच कमी होत असलेल्या पाणीसाठ्यावर अधिक ताण येण्याची शक्यता आहे. या पार्श्वभूमीवर पाण्याचा वापर नियंत्रित ठेवणे आणि योग्य नियोजन करणे आवश्यक ठरत आहे. पाणीटंचाई टाळण्यासाठी प्रशासन विविध उपाययोजना आखत असून, नागरिकांनीही पाणी जपून वापरण्याचे आवाहन करण्यात येत आहे.
