वसई : वसई-विरार महापालिकेकडून प्रतिबंधित प्लास्टिकविरोधात मोठी कारवाई करण्यात आली आहे. नालासोपारा पश्चिमेतील श्रीप्रस्थ परिसरातील एका गोदामावर छापा टाकून तब्बल ३ हजार २०० किलो प्रतिबंधित प्लास्टिक जप्त करण्यात आले असून संबंधितांवर पाच हजार रुपयांचा दंडही आकारण्यात आला आहे. शहरात प्लास्टिक वापरावर बंदी असतानाही अनेक ठिकाणी प्लास्टिक पिशव्यांचा सर्रास वापर सुरू असल्याचे दिसून येत आहे. महापालिकेकडून वेळोवेळी आवाहन करूनही अनेक दुकानदार, फळविक्रेते आणि इतर व्यावसायिकांकडून प्रतिबंधित प्लास्टिकचा वापर सुरूच असल्याने दैनंदिन कचऱ्यात प्लास्टिकचे प्रमाण वाढत असल्याची चिंता व्यक्त केली जात आहे.
या पार्श्वभूमीवर महापालिकेच्या घनकचरा व्यवस्थापन विभागाने एकल वापर प्लास्टिकविरोधात विशेष मोहीम हाती घेतली आहे. बुधवारी प्लास्टिकविरोधी पथकाने नालासोपारा पश्चिम येथील श्रीप्रस्थ तिसरा रस्ता परिसरातील एका गोदामावर धाड टाकली. तपासणीदरम्यान मोठ्या प्रमाणात प्रतिबंधित प्लास्टिकचा साठा आढळून आला. या कारवाईत ३२०० किलो प्लास्टिक जप्त करण्यात आले असून संबंधितांवर पाच हजार रुपयांचा दंड आकारण्यात आला आहे. ही कारवाई उपायुक्त (घनकचरा) अर्चना दिवे, सहायक आयुक्त जितेंद्र नाईक, स्वच्छता निरीक्षक, स्वच्छता मार्शल आणि इतर कर्मचाऱ्यांच्या उपस्थितीत करण्यात आली. शहर प्लास्टिकमुक्त करण्यासाठी पुढेही अशाच प्रकारच्या कारवाया सुरू राहणार असल्याचे महापालिकेकडून स्पष्ट करण्यात आले आहे.
