पुणे : नागरिकांच्या आरोग्याशी तडजोड करणाऱ्या अन्न व्यावसायिकांविरोधात अन्न व औषध प्रशासनाने (एफडीए) पुन्हा एकदा कठोर कारवाई करत पुण्यासह सातारा, सांगली आणि कोल्हापूरमधील एकूण १० बेकरी, हॉटेल्स, डेअरी आणि कॅन्टीनचे परवाने तातडीने निलंबित केले आहेत. गुरुवार आणि शुक्रवारी राबविण्यात आलेल्या विशेष तपासणी मोहिमेदरम्यान अन्न सुरक्षा नियमांचे गंभीर उल्लंघन आणि मोठ्या प्रमाणावर अस्वच्छता आढळून आल्याने ही कारवाई करण्यात आली. या मोहिमेत पुण्यातील कोंढवा येथील प्रसिद्ध गोल्डन बेकरी, येवलेवाडीतील गोल्डन मॅजेस्टिक बेकरी, मंगळवार पेठेतील स्टार केटरिंग सर्व्हिस, सोमवार पेठेतील अशोक बार अँड रेस्टॉरंट आणि बाणेर परिसरातील बिकांगे बिर्यानी एलएलपी या आस्थापनांवर तातडीची कारवाई करण्यात आली. तपासणीदरम्यान या ठिकाणी अन्न सुरक्षा व मानके कायद्याचे (FSSAI) उल्लंघन होत असल्याचे निदर्शनास आले. तसेच अन्नपदार्थ अत्यंत अस्वच्छ आणि गलिच्छ वातावरणात तयार केले जात असल्याचेही अधिकाऱ्यांच्या पाहणीत स्पष्ट झाले. कारवाईदरम्यान एफडीएने काही छायाचित्रेही प्रसिद्ध केली असून, त्यातून अन्न तयार करण्याच्या ठिकाणांवरील स्वच्छतेची गंभीर अवस्था समोर आली आहे. या कारवाईमुळे अन्नपदार्थांमध्ये भेसळ करणाऱ्या तसेच स्वच्छतेच्या नियमांकडे दुर्लक्ष करणाऱ्या व्यावसायिकांमध्ये खळबळ उडाली आहे.
ही मोहीम केवळ पुणे शहरापुरती मर्यादित न ठेवता इतर जिल्ह्यांमध्येही राबविण्यात आली. पुणे जिल्ह्यातील अंबेगाव तालुक्यात पारगाव पेठ येथील सिद्धार्थ ॲग्रो-डेअरी, सातारा जिल्ह्यातील महाबळेश्वर येथील सह्याद्री रेस्टॉरंट अँड ढाबा आणि सिगडी रेस्टॉरंट, कोल्हापूर जिल्ह्यातील करवीर येथील व्हीबीजीओआर शाळेचे कॅन्टीन तसेच सांगलीतील हलद भवन कॅन्टीन यांच्याविरोधातही परवाने निलंबित करण्याची कारवाई करण्यात आली. तपासणीदरम्यान या सर्व आस्थापनांमध्ये स्वच्छतेच्या मूलभूत निकषांचे पालन होत नसल्याचे आणि अन्न सुरक्षा मानकांचे उल्लंघन झाल्याचे आढळून आले. नागरिकांच्या आरोग्याशी संबंधित बाबींमध्ये कोणतीही तडजोड सहन केली जाणार नाही, असा स्पष्ट इशारा एफडीएने दिला आहे. अन्नपदार्थांची गुणवत्ता, स्वच्छता आणि सुरक्षितता सुनिश्चित करण्यासाठी राज्यभर अशाच प्रकारच्या विशेष तपासणी मोहिमा पुढेही सातत्याने राबविण्यात येणार असल्याचे प्रशासनाने स्पष्ट केले आहे. त्यामुळे अन्न व्यवसायिकांनी नियमांचे काटेकोर पालन करावे, अन्यथा कठोर कारवाईला सामोरे जावे लागेल, असा इशाराही एफडीएने दिला आहे.
