मुंबई : गणेशोत्सवासाठीकोकणात जाणाऱ्या भाविकांच्या वाहनांना टोलमाफी देण्याचा निर्णय राज्य सरकारने घेतला आहे. सार्वजनिक बांधकाम विभागाच्या तसेच राज्य रस्ते विकास महामंडळाच्या अखत्यारीतील रस्त्यांवरील टोलनाक्यांवर ही सुविधा उपलब्ध होणार आहे. या निर्णयानुसार, २३ ऑगस्ट ते ८ सप्टेंबर या कालावधीत मुंबई-बंगळुरू राष्ट्रीय महामार्ग, मुंबई-गोवा राष्ट्रीय महामार्ग आणि इतर सार्वजनिक बांधकाम विभागाच्या तसेच महाराष्ट्र राज्य रस्ते विकास महामंडळाच्या अखत्यारीतील रस्त्यांवरून कोकणात जाणाऱ्या भाविकांना तसेच एसटी बसला टोलमाफीची सवलत मिळणार आहे.
सार्वजनिक बांधकाम विभागाचे उपसचिव सचिन चिवटे यांनी याबाबतचे परिपत्रक जारी केले आहे. ग्रामीण व शहर पोलिस, आरटीओ यांच्यामार्फत दिल्या जाणाऱ्या पासची एकत्रित माहिती सार्वजनिक बांधकाम विभागाला सादर करण्याच्या सूचना दिल्या आहेत. “गणेशोत्सव २०२५ कोकण दर्शन” अशा आशयाचे स्टीकर्स स्वरूपाचे टोलमाफी पासवर गाडी क्रमांक, चालकाचे नाव असा मजकूर नमूद असेल. परिवहन विभाग, वाहतूक विभाग, पोलिस ठाणे, आरटीओ यांनी समन्वय साधून पोलिस ठाणे, वाहतूक पोलिस चौकी आणि आरटीओ कार्यालयात पास उपलब्ध करून देण्याच्या सूचना दिल्या आहेत.
