मुंबई : दुकाने आणि विविध आस्थापनांवर मराठीत पाट्या असाव्यात, यासाठी राज ठाकरे यांच्या महाराष्ट्र नवनिर्माण सेनेनं महाराष्ट्रात आक्रमक आंदोलन छेडलं होतं. त्यानंतर मराठी पाट्यांच्या सक्तीविरोधात काही व्यापाऱ्यांनी कोर्टाचा दरवाजा ठोठावला होता. मात्र आता सुप्रीम कोर्टानेच पुढील दोन महिन्यांत दुकानांवर मराठी पाट्या लावण्याचे आदेश दिले आहेत. या पार्श्वभूमीवर राज ठाकरे यांनी कोर्टाचे आभार मानले असून व्यापाऱ्यांना इशाराही दिला आहे.
“पुढील २ महिन्यांत महाराष्ट्रातील दुकानं, आस्थापन ह्यांच्यावर मराठी पाट्या लागल्याचं पाहिजेत असा स्पष्ट निकाल सुप्रीम कोर्टाने दिला, त्याबद्दल कोर्टाचे मनापासून आभार. ‘मराठी पाट्या’ या मुद्द्यासाठी महाराष्ट्र नवनिर्माण सेनेने गेली कित्येक वर्ष जो संघर्ष केला त्याला आजच्या निर्णयाने एक मान्यताच मिळाली,” अशा शब्दांत राज ठाकरे यांनी समाधान व्यक्त केलं. तसंच दुकानदारांनी नसत्या भानगडीत पडू नये आणि न्यायालयाच्या निर्णयाचा आदर करावा आणि इथलं सरकार लक्ष ठेवेल, कारवाई करेल ती करेल, पण माझ्या महाराष्ट्र सैनिकांचं पण लक्ष असेल हे विसरू नका, असा इशाराही राज ठाकरे यांनी दिला आहे.
सुप्रीम कोर्टाच्या निकालानंतर राज ठाकरे यांनी सोशल मीडियावर पोस्ट लिहीत म्हटलं आहे की, “मुळात ज्या राज्याची जी भाषा आहे त्या भाषेत दुकानं, आस्थापनं ह्यांच्यावर त्या भाषेत पाट्या असायला हव्यात इतका साधा नियम असताना, त्याला विरोध करून इथल्या मूठभर व्यापाऱ्यांनी हा लढा न्यायालयात का नेला? महाराष्ट्रात असाल तर मराठीत इतर राज्यात असाल तर तिथल्या भाषेत पाट्या असणं किंवा त्या ठिकाणी त्या भाषेचा सन्मान करणं ह्यात विरोध करण्यासारखं काय होतं. तुम्ही जर व्यापारासाठी इथे महाराष्ट्रात येता तर इथल्या भाषेचा सन्मान तुम्ही केलाच पाहिजे. असो, माझ्या महाराष्ट्र सैनिकांनी ह्या मुद्द्यावर संघर्ष केला, आता सर्वोच्च न्यायालयाने पण ह्यावर काही मूठभर व्यापाऱ्यांना चपराक दिली आहे. महाराष्ट्रातल्या प्रत्येक दुकानावर आणि आस्थापनांवर ठळक मराठी भाषेतील पाटी हवी म्हणजे हवी, आणि हे पाहणं आता महापालिका प्रशासन आणि काही प्रमाणात पोलीस प्रशासनाचं काम आहे. ‘मराठी पाट्या’ ह्याबाबत जागृती ही माझ्या महाराष्ट्र सैनिकांमुळे आली त्यासाठी तुमचं मनापासून अभिनंदन. तुम्ही सतर्क राहिलात तसंच पुढे देखील राहिलं पाहिजेत,” असं आवाहनही राज ठाकरे यांनी मनसे कार्यकर्त्यांना केलं आहे.