मुंबई : स्वामी विरंगुळा ज्येष्ठ नागरिक केंद्र, परळ येथे एनसीएमसी (नॅशनल कॉमन मोबिलिटी कार्ड) नोंदणी शिबिराचे यशस्वी आयोजन करण्यात आले. फेस्कॉम, मुंबई प्रादेशिक विभागाचे श्री सुरेश ईश्वर पोटे यांच्या मार्गदर्शन व सहकार्याने आयोजित या शिबिराला ज्येष्ठ नागरिकांचा उत्स्फूर्त प्रतिसाद लाभला. सकाळी १० ते दुपारी ३ या वेळेत पार पडलेल्या शिबिरात एकूण ७० ज्येष्ठ नागरिकांनी नोंदणी करून या सुविधेचा लाभ घेतला. संपूर्ण कार्यक्रम शिस्तबद्ध, नियोजनबद्ध आणि उत्साही वातावरणात पार पडला. शिबिराच्या यशस्वी आयोजनासाठी श्री योगेश तोडकर आणि श्री मनोहर शिंदे यांनी महत्त्वपूर्ण योगदान देत उपस्थितांना आवश्यक मार्गदर्शन केले.
या उपक्रमासाठी स्वामी संस्थेच्या पदाधिकाऱ्यांनी आणि विश्वस्तांनी विशेष सहकार्य केले. संस्थेच्या उपाध्यक्ष श्रीमती वैशाली विष्णु शिंदे, कार्याध्यक्ष श्री मोहन कटारे, उपसचिव श्रीमती प्रतिभा सपकाळे, खजिनदार श्री उल्हास हरमळकर तसेच प्रमुख विश्वस्त प्रतिभा सावंत, विमल माळोदे, गीता नाडकर्णी, नीलम सावंत आणि शिवाजी गावकर यांनी शिबिर यशस्वी करण्यासाठी मोलाची भूमिका बजावली. एनसीएमसी कार्डमुळे ज्येष्ठ नागरिकांना एसटी, बेस्ट, मेट्रो आणि रेल्वे प्रवासासाठी एकच कार्ड वापरण्याची सुविधा उपलब्ध होणार असल्याने उपस्थितांनी समाधान व्यक्त केले. तसेच असे उपक्रम भविष्यातही आयोजित करण्यात यावेत, अशी अपेक्षाही अनेकांनी व्यक्त केली. स्वामी ज्येष्ठ नागरिक विरंगुळा केंद्रात हे शिबिर आयोजित केल्याबद्दल संस्थेच्या वतीने श्री सुरेश पोटे यांचे विशेष आभार मानण्यात आले.
