वृत्तसंस्था : काँग्रेसच्या ज्येष्ठ नेत्या सोनिया गांधी यांनी वयाच्या ७९व्या वर्षी सोशल मीडियावर अधिकृत पदार्पण करत इन्स्टाग्रामवर खाते सुरू केले आहे. त्यांच्या या अनपेक्षित डिजिटल प्रवेशाची राजकीय आणि सोशल मीडियावर मोठी चर्चा रंगली असून, पहिल्याच पोस्टला काही मिनिटांतच मोठा प्रतिसाद मिळाला. इन्स्टाग्रामवरील पहिल्या व्हिडिओमध्ये त्यांनी त्यांच्या आगामी ‘Belonging: A Journey of Love’ या बहुचर्चित आत्मचरित्राची पहिली प्रत चाहत्यांसमोर सादर केली. प्रकाशकांकडून पुस्तकाची हार्डकव्हर प्रत आणि पेढ्यांचा बॉक्स स्वीकारताना त्या आनंदी आणि भावूक दिसत आहेत. त्यानंतर पुस्तकाची पाने चाळताना त्यांनी शेजारी बसलेल्या कन्या प्रियांका गांधी यांना प्रेमाने, “प्रियांका, यात खूप फोटो आहेत,” असे सांगत जुन्या आठवणींनी भरलेले फोटो दाखवले. या प्रसंगी प्रियांका गांधी यांनी आईला पेढा भरवून मिठी मारल्याचा हृदयस्पर्शी क्षणही व्हिडिओमध्ये पाहायला मिळतो. आपल्या पहिल्याच पोस्टमध्ये सोनिया गांधी यांनी, “हॅलो एव्हरीवन, तुमच्या सर्वांसोबत हा क्षण शेअर करताना मला अतिशय आनंद होत आहे. हे पुस्तक प्रेम, कर्तव्य, दुःख आणि स्वतःचे अस्तित्व शोधण्याचा एक प्रवास आहे,” असा संदेश देत थेट चाहत्यांशी संवाद साधला. त्यांच्या या पोस्टमुळे सोशल मीडियावर मोठ्या प्रमाणात प्रतिक्रिया उमटत असून, आत्मचरित्राबाबतची उत्सुकताही वाढली आहे.
सोनिया गांधी यांचे ‘Belonging: A Journey of Love’ हे आत्मचरित्र १० नोव्हेंबर रोजी जगभरात एकाच वेळी प्रकाशित होणार आहे. या पुस्तकात गांधी कुटुंबावर झालेल्या आरोपांच्या पलीकडे जाऊन त्यांच्या आयुष्यातील मानवी पैलू, चुका, भावना आणि कठीण निर्णयांचा प्रामाणिक आढावा मांडण्यात आला आहे. विशेषतः १९८४ मध्ये तत्कालीन पंतप्रधान इंदिरा गांधी यांच्या हत्येनंतर आणि १९९१ मध्ये माजी पंतप्रधान राजीव गांधी यांच्या हत्येनंतर त्यांच्या आयुष्यात झालेला आमूलाग्र बदल, त्या काळातील भावनिक संघर्ष, कुटुंबाची जबाबदारी आणि सार्वजनिक जीवनातील आव्हाने यांचा संवेदनशील उल्लेख पुस्तकात करण्यात आला आहे. त्यामुळे हे आत्मचरित्र केवळ राजकीय प्रवासापुरते मर्यादित न राहता एका व्यक्तीच्या आयुष्यातील भावनिक आणि मानवी अनुभवांची कहाणी उलगडणारे ठरणार असल्याची चर्चा आहे. इन्स्टाग्रामवरील पहिल्याच पोस्टमधून आत्मचरित्राची झलक सादर करून सोनिया गांधी यांनी डिजिटल माध्यमात प्रभावी सुरुवात केली असून, त्यांच्या या नव्या प्रवासासह पुस्तकाच्या प्रकाशनाबाबतची उत्सुकता आणखी वाढली आहे.
