ठाणे : नाशिकमधील ड्रग्ज तस्करीचे प्रकरण उजेडात आले असले, तरी ‘महामुंबई’ हे ड्रग्ज तस्करीचे नवे केंद्र बनले आहे. रेल्वे, रस्ते, कुरीअर तसेच परदेशातून कंटेनरद्वारे महामुंबई परिसरात ड्रग्जची तस्करी होत असून, ऑनलाइनच्या माध्यमातून ड्रग्जचा पुरवठा केला जात आहे. परिणामी, शहरांमध्ये तस्करांबरोबर नशेबाजांचा सुळसुळाट झाला असून, तरुणांमध्ये अमली पदार्थांचे सेवन करण्याचे प्रमाण वाढू लागले आहे. एकप्रकारे महामुंबई ड्रग्जच्या विळख्यात सापडली असून, आतापर्यंत पोलिसांनी असंख्य कारवाया करत तस्करांना जेरबंद केले आहे. तरीही महामुंबईतील ड्रग्ज तस्करीवर अंकुश आलेला नसल्याची गंभीर स्थिती आहे. नाशिकमधील ड्रग्ज तस्करीचे प्रकरण राज्यात गाजत असले, तरी महामुंबईमध्ये ड्रग्ज तस्करीचा प्रश्न आ वासून उभा राहिला आहे. विविध शहरांमध्ये ड्रग्जची तस्करी केली जात ठाणे, मिरा-भाईंदर, कल्याण-डोंबिवली, भिवंडी, अंबरनाथ, बदलापूरसह वसई-विरार आदी शहरे याला अपवाद नाहीत. मुळात ड्रग्ज पकडल्यानंतर मुख्य सूत्रधारांचा शोध लागत नाही. परिणामी शहरांमध्ये ड्रग्जचा येणारा ओघ चालूच राहतो. ड्रग्जच्या तस्करीसाठी नानाविध मार्गाचा अवलंब केला जात असल्याने याची अनेकदा पोलिसांना साधी कुणकुणही लागत नाही. ड्रग्ज तस्कर तरुणांना जाळ्यात ओढत त्यांना ड्रग्जचा पुरवठा करतात. नशा करता-करता हेच तरुण ड्रग्ज तस्करीमध्ये उतरतात. विशेष गंभीर बाब म्हणजे, महामुंबईमध्ये परराज्यातून तसेच परदेशातूनही ड्रग्जची तस्करी होत असून, अत्यंत महत्त्वाचे बंदर असलेल्या जेएनपीटीला ये-जा करण्याचा मार्ग महामुंबईतूनच जात असल्याने याचाही फायदा तस्कर घेत असल्याचे बोलले जात आहे.
गतवर्षी नवी मुंबई आणि पंजाब पोलिसांनी पनवेलमध्ये कारवाई करत दुबईमधून कंटेरनमध्ये चोरीछुपे आणलेले ३६२ कोटींचे हेरॉइन जप्त केले होते. आफ्रिकन देशातून कोकेन आणून मुंबई, ठाणे परिसरात विक्री होत असून २०२२ मध्ये ठाणे पोलिसांनी एका आरोपीला अटक करत १ कोटींचे कोकेन, एमडी जप्त केले होते. चौकशीत हे ड्रग्ज आरोपींनी परदेशातून आणल्याची बाब स्पष्ट झाली होती. बस, ट्रक, रेल्वेद्वारे गांजा, अफूसह इतर ड्रग्जची परराज्यांतून महामुंबईमध्ये तस्करी केली जात असून, विशेषकरून आंध्र प्रदेशमधून गांजाची तस्करी होत असल्याचे दिसून येते. ऑनलाइन, कुरिअरद्वारे ड्रग्ज मागवले जात असून, दोन वर्षांपूर्वी ठाणे पोलिसांनी एलएसडी पेपर तस्करीप्रकरणी तिघांना अटक केली होती. हे पेपर ऑनलाइन मागवून नंतर कुरिअरच्या माध्यमातून पाठवले जात होते. गेल्या काही वर्षात महामुंबईमध्ये मेफोड्रोनच्या (एमडी) तस्करीमध्ये प्रचंड वाढ झाली आहे. याच वर्षी ठाणे पोलिसांनी रत्नागिरीमध्ये एमडी तयार करण्याचा कारखाना उभारण्याचा तस्करांचा डाव उधळला होता. मात्र, या प्रकरणातील आरोपींनी हरियाणात मेफोड्रोन, इफेड्रीनचा कारखाना सुरू केला होता. नंतर या कारखान्यावरही ‘डीआरआय’ने छापा टाकून ६६१ किलो इफेड्रिन जप्त केले होते.
नुकतेच पालघर जिल्ह्यातील मोखाड्यामध्ये पोलिसांनी कारखान्यावर छापा टाकत ३६ कोटींचे एमडी तर, गेल्यावर्षी ठाणे पोलिसांनी ५० लाखांपेक्षा जास्त किंमतीचे केटामाइन ड्रग्ज जप्त केले होते. केटामाइन तस्करीचे धागेदोरे चक्क गुजरातपर्यंत पोहोचले होते. अनेकदा ड्रग्ज तस्करीचे रॅकेट आंतरराज्यीय पातळीवर कार्यरत असल्याचे दिसून येते. त्यामुळे परराज्यात जाऊन आरोपींचा शोध घेताना पोलिसांचा कस लागत असली तरी ड्रग्ज तस्करीवर अंकुश येणार कधी असा प्रश्न उपस्थित होत आहे.
