पुणे : वाघोली परिसरातील एका प्रसिद्ध बँक्वेट हॉलमध्ये सुरू असलेल्या लग्नसोहळ्यात धक्कादायक चोरीची घटना उघडकीस आली आहे. १४ मे रोजी ‘श्रेयस बँक्वेट हॉल’मध्ये लग्नाची लगबग सुरू असताना सनई-चौघड्यांच्या सुरांत आणि पाहुण्यांच्या गर्दीत तीन संशयित महिलांनी चलाखीने मोठा डाव साधला. विवाह सोहळ्याच्या तयारीत संपूर्ण कुटुंब व्यस्त असताना नवरी मेकअप रूममध्ये लग्नासाठी सजत होती. अक्षता पडून विवाह सोहळा थाटामाटात पार पडला, मात्र नंतर वधू आपल्या खोलीत परतल्यानंतर चोरीचा प्रकार उघडकीस आला. खोलीतील पर्समध्ये ठेवलेले सव्वा लाख रुपये किमतीचे सोन्याचे दागिने गायब झाल्याचे पाहून वधू आणि तिच्या कुटुंबीयांना मोठा धक्का बसला. काही मिनिटांच्या गर्दीचा आणि गोंधळाचा फायदा घेत संशयित महिलांनी खोलीत प्रवेश करून अत्यंत शिताफीने दागिने चोरून पळ काढल्याचे समोर आले आहे.
मिळालेल्या माहितीनुसार, दोन अल्पवयीन मुलींसह तीन संशयित महिला पाहुण्यांच्या गर्दीत मिसळून कोणालाही संशय न येऊ देता थेट वधूच्या खोलीपर्यंत पोहोचल्या. खोलीत कोणी नसल्याची खात्री करून त्यांनी वधूच्या पर्समधील सोन्याचे दागिने लंपास केले. लग्नाचा कार्यक्रम संपल्यानंतर दागिन्यांची चोरी झाल्याचे लक्षात येताच आनंदाचे वातावरण क्षणात चिंतेत बदलले. याप्रकरणी केसनंद येथील एका ३० वर्षीय व्यक्तीने वाघोली पोलीस ठाण्यात तक्रार दाखल केली असून पोलिसांनी दोन अल्पवयीन मुलींसह तीन संशयित महिलांविरुद्ध गुन्हा दाखल केला आहे. लग्नस्थळ आणि परिसरातील सीसीटीव्ही फुटेजच्या आधारे पोलिसांनी तपास सुरू केला असून या ‘लेडीज गँग’चा शोध घेतला जात आहे. या घटनेमुळे लग्नसमारंभांसारख्या गर्दीच्या ठिकाणी मौल्यवान वस्तूंची काळजी घेणे किती आवश्यक आहे, याची पुन्हा एकदा जाणीव झाली आहे.
