वृत्तसंस्था : जागतिक फुटबॉल विश्वात एक ऐतिहासिक आणि चर्चेचा विषय ठरलेली घडामोड समोर आली आहे. जगभरातील फुटबॉल चाहत्यांच्या मोठ्या मतदानानंतर पोर्तुगालचा स्टार फुटबॉलपटू ख्रिस्तियानो रोनाल्डो याला सर्वकालीन सर्वोत्कृष्ट बॅलन डी’ओर हंगामासाठी देण्यात येणाऱ्या ‘BOAT’ (Best of All Ballon d’Or Titles) या नव्या पुरस्काराचा पहिला मानकरी घोषित करण्यात आले आहे. रोनाल्डोचा २००८ मधील मँचेस्टर युनायटेडसोबतचा हंगाम हा बॅलन डी’ओरच्या इतिहासातील सर्वोत्तम हंगाम म्हणून चाहत्यांनी निवडला. फुटबॉलमधील सर्वश्रेष्ठ वैयक्तिक कामगिरी कोणती, यावर सुरू असलेल्या चर्चांना नवे वळण देण्यासाठी फ्रान्स फुटबॉल संस्थेने हा विशेष पुरस्कार सुरू केला. यापूर्वी हॅरी केनने बॅलन डी’ओर जिंकल्यानंतर या नव्या पुरस्कारासाठी चाहत्यांकडून ऑनलाइन मतदान घेण्यात आले. पारंपरिक बॅलन डी’ओरप्रमाणे पत्रकारांच्या मतदानाऐवजी या पुरस्काराचा संपूर्ण निर्णय चाहत्यांवर सोपवण्यात आला होता. नामांकन यादीत अनेक वेळा बॅलन डी’ओर जिंकलेल्या दिग्गज खेळाडूंचा समावेश करण्यात आला होता.
या ऐतिहासिक मतदानात रोनाल्डोने त्याचा दीर्घकालीन प्रतिस्पर्धी लिओनेल मेस्सी याला मागे टाकत पहिल्या ‘BOAT’ पुरस्कारावर नाव कोरले. विशेष म्हणजे, मेस्सीच्या २०१२ मधील ९१ गोलांच्या विक्रमी हंगामापेक्षा रोनाल्डोच्या २००८ मधील कामगिरीला अधिक पसंती मिळाली. मतदान प्रक्रियेत सहभागी होण्यासाठी प्रत्येक चाहत्याला १ युरो शुल्क भरावे लागले होते. मतदानाला अधिक प्रतिसाद मिळावा यासाठी आयोजकांनी २०२७ च्या बॅलन डी’ओर सोहळ्याची दोन व्हीआयपी तिकिटे जिंकण्याची संधीही उपलब्ध करून दिली होती. या उपक्रमाला मोठा प्रतिसाद मिळाला असून हजारो चाहत्यांनी मतदान केले, तर ५ हजारांहून अधिक चाहत्यांनी आपल्या आवडत्या खेळाडूच्या समर्थनार्थ एकापेक्षा अधिक वेळा मतदान केले. अंतिम क्रमवारीत पहिल्या १२ स्थानांवर रोनाल्डो आणि मेस्सी यांचेच वर्चस्व राहिले. तर २००२ मधील रोनाल्डो नाझारिओचा बॅलन डी’ओर विजय हा या यादीतील पहिला वेगळा हंगाम ठरला. नव्या पुरस्कारामुळे फुटबॉल चाहत्यांमध्ये पुन्हा एकदा रोनाल्डो आणि मेस्सी यांच्या सर्वोत्तम कामगिरीबाबतची चर्चा रंगली आहे.
