वृत्तसंस्था : रोहितचा ‘हिट’ शो नेमका कसा असतो, याचा उत्तम वसुपाठ यावेळी सर्वांना पाहायला मिळाला. रोहित खेळायला आला आणि त्यांने फटकेबाजीच्या जोरावर सर्वांची मनं जिंकली. रोहितने या सामन्यात फक्त शतकं झळकावली नाही तर त्यांने आपल्या नावावर तीन वर्ल्ड रेकॉर्डही केल्याचे पाहायला मिळाले. अफगाणिस्तानने भारतापुढे विजयसाठी २७३ धावांचे आव्हान ठेवले होते. रोहितच्या शतकाच्या जोरावर भारताने हे आव्हान लीलया पेलले आणि ८ विकेट्स राखून मोठा विजय साकारला. रोहित शर्मा फलंदाजीला आला आणि त्याने सुरुवातीपासूनच जोरदार फटकेबाजीला सुरुवात केली. रोहितने या सामन्याक प्रथम वर्ल्ड कपमधील सर्वात जलद १००० धावांचा विश्वविक्रम आपल्या नावावर केला. रोहितने यावेळी सचिन तेंडुलकरला पिछाडीवर सोडले. त्यानंतर रोहितने आंतरराष्ट्री क्रिकेटमधील सर्वाधिक षटकारांचा वर्ल्ड रेकॉर्ड आपल्या नावावर केला. यापूर्वी हा वर्ल्ड रेकॉर्ड ख्रिस गेलच्या नावावर होता. पण रोहितने आंतरराष्ट्रीय क्रिकेटमधील सर्वाधिक षटकारांचा विश्वविक्रम यावेळी रचला. त्यानंतर रोहित शर्माने आपले शतक झळकावले आणि त्याने अजून एका वर्ल्ड रेकॉर्डला गवसणी घातली. यापूर्वी वर्ल्ड कपमध्ये सर्वाधिक शतकांचा विश्वविक्रम हा सचिन तेंडुलकरच्या नावावर होता. सचिनने वर्ल्ड कपमध्ये सहा शतकं झळकावली होती. पण रोहितने यावेळी वर्ल्ड कपमधील आपले सातवे शतक झळकावले आणि हा विश्वविक्रमही त्याने आपल्या नावावर केला. शतक झळकावल्यावर रोहित शर्मा जास्त काळ खेळू शकला नाही. रोहितने यावेळी ८४ चेंडूंत १४ चौकार आणि पाच षटकारांच्या जोरावर १३१ धावांची धडाकेबाज खेळी साकारली. रोहितच्या या शतकाच्या जोरावर भारताचा हा विजय आरामात मिळाला.
यापूर्वी अफगाणिस्तानने भारताच्या गोलंदाजीचा प्रतिकार करताना २७२ धावांचा डोंगर उभारला होता. कर्णधार शाहिदीने यावेळी भारताच्या गोलंदाजीवर चांगलाच हल्ला चढवला. शाहिदीला यावेळी अझामतुल्ला ओमरझाईने चांगली साथ दिली. या दोघांनी चौथ्या विकेटसाठी १२१ धावांची दमदार भागीदारी रचली. त्यामुळेच अफगाणिस्तानच्या संघाला मोठी धावसंख्या उभारण्यात यश आले. ओमरझाई हा ६२ धावांवर बाद झाला. पण त्यानंतर शाहिदी खेळत राहीला आणि त्याने संघाला २०० धावांचा टप्पा गाठून दिला. शाहिदीचे शतक यावेळी २० धावांनी हुकले. शाहिदीने यावेळी ८ चौकार आणि एका षटकाराच्या जोरावर ८० धावांची दमदार खेळी साकारली. त्यामुळेच अफगाणिस्तानला यावेळी मोठी धावसंख्या उभारता आली होती. भराताकडून यावेळी वेगवान गोलंदाज जसप्रीत बुमराने चार विकेट्स मिळवले.