पुणे : राज्यात चोरट्यांनी धुमाकूळ घातला असूनदररोज राज्यातील वेगवेगळ्या भागातून चोरीच्या घटना उघडकीस येत असतात. हिंदी चित्रपट अभिनेत्री संगीता बिजलानी यांच्या पवना धरणाच्या बँक वॉटरला असलेल्या तिकोना पेठ येथील फार्म हाऊसमध्ये चोरी झाल्याची घटना उघडकीस आली आहे. यामध्ये चोरट्यांनी रोख रक्कम आणि टीव्ही असा ऐवज लंपास केला आहे. ५० हजार रुपयांची रोख रक्कम आणि ७ हजार रुपये किंमतीचा टीव्ही चोरला आहे. याप्रकरणी चोरट्यांविरुद्ध लोणावळा ग्रामीण पोलीस ठाण्यात गुन्हा दाखल करण्यात आला आहे. याबाबत मोहमद मुजीफ खान (वय ५४, रा . जयसिंगपुरा, छत्रपती संभाजीनगर) यांनी लोणावळा ग्रामीण पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे.
मोहमद खान हे माजी क्रिकेटपटू मोहमद अजहरउद्दीन यांचे स्वीय सहायक आहेत. संगीता मोहमद अजहरउद्दीन-बिजलानी यांच्या मालकीचा मावळ तालुक्यातील तिकोना पेठ येथे बंगला आहे. बंगल्याच्या मागील बाजूस कुंपण आहे. कुंपणाला लावलेली जाळी तोडून चोरट्यांनी प्रवेश केला. चोरटे बंगल्यातील पहिल्या मजल्यावर शिरले. खिडकीची जाळी उचकटून आत प्रवेश केला. चोरट्यांनी शयनगृहातील कपाट उचकटून ५० हजारांची रोकड आणि सात हजार रुपये किंमतीचा दूरचित्रवाणी संच असा एकुण मिळून ५७ हजारांचा मुद्देमाल लांबविला, असे खान यांनी फिर्यादीत म्हटले आहे. याप्रकरणी पोलीस हवालदार एस. एस. बोकड तपास करत आहेत. पसार झालेल्या चोरट्यांचा माग काढण्यात येत असल्याचे लोणावळा ग्रामीण पोलिस ठाण्याचे पोलीस निरीक्षक दिनेश तायडे यांनी सांगितले.