नवी मुंबई : नवी मुंबई शहरात डासांची पैदास रोखून डेंग्यू, मलेरिया आणि इतर डासजन्य आजारांचा धोका कमी करण्यासाठी नवी मुंबई महानगरपालिकेने विशेष रासायनिक फवारणी मोहीम सुरू केली आहे. महापालिकेच्या आरोग्य विभागामार्फत १६ ते २१ नोव्हेंबर या कालावधीत शहरातील विविध भागांमध्ये नियोजनबद्ध पद्धतीने फवारणी केली जाणार आहे. प्रत्येक शहरी प्राथमिक आरोग्य केंद्राच्या कार्यक्षेत्रात एका दिवसात फवारणी पूर्ण करण्याचे उद्दिष्ट ठेवण्यात आले असून, संपूर्ण शहर सहा गटांमध्ये विभागून ही मोहीम राबविण्यात येत आहे.
या मोहिमेनुसार १६ नोव्हेंबर रोजी सीबीडी, वाशीगाव, इंदिरानगर आणि रबाडा परिसरात फवारणी करण्यात आली. १७ नोव्हेंबर रोजी सेक्टर ४८, कुकशेत, सानपाडा, खैराणे आणि दिघा भागात मोहीम राबविण्यात आली. १८ नोव्हेंबर रोजी करावे, नेरुळ-२, तुर्भे, महापे आणि ऐरोली परिसरात फवारणी होणार असून, १९ नोव्हेंबर रोजी शिरवणे, जुहूगाव, काटकरीपाडा आणि चिंचपाडा येथे फवारणीचे नियोजन करण्यात आले आहे. त्यानंतर २० नोव्हेंबर रोजी नेरुळ-१, पावणे, घणसोली आणि इल्थानपाडा परिसरात, तर २१ नोव्हेंबर रोजी नोसिल नाका परिसरात मोहीम राबविण्यात येणार आहे. महापालिकेकडून नियमित अळीनाशक आणि धूर फवारणी केली जात असली तरी डास नियंत्रण अधिक प्रभावी करण्यासाठी ही विशेष मोहीम हाती घेण्यात आली आहे. आरोग्य विभागाच्या पथकांना नागरिकांनी सहकार्य करावे, असे आवाहन महापालिकेने केले आहे. तसेच महापौर सुजाता सूरज पाटील आणि महापालिका आयुक्त डॉ. कैलास शिंदे यांनीही नागरिकांनी या मोहिमेत सक्रिय सहभाग घ्यावा, असे आवाहन केले आहे. फवारणीबाबत कोणतीही तक्रार किंवा सूचना असल्यास नागरिकांनी आपल्या जवळच्या शहरी प्राथमिक आरोग्य केंद्राशी संपर्क साधावा, असेही महापालिकेने स्पष्ट केले आहे.

