मुंबई : खड्ड्यांची समस्या कमी करण्यासाठी महापालिका गेल्या काही वर्षांपासून मुंबईतील रस्त्यांचे टप्प्याटप्प्याने काँक्रिटीकरण करत असली तरी, खड्ड्यांची समस्या काही कमी झालेली नाही. महापालिका आपलेच खड्ड्यांचे विक्रम मोडते आहे. पालिकेने दोन दिवसांपूर्वी यंदाच्या वर्षी आतापर्यंत ५९ हजार ३१३ खड्डे बुजवण्यात आल्याचे म्हटले आहे. गेल्या तीन वर्षांतील आकडेवारीनुसार ही संख्या विक्रमी आहे. सन २०२२ मध्ये ३८ हजार ३१० खड्डे पडले होते तर २०२१ मध्ये ४३ हजार ४७८ खड्ड्यांची नोंद झाली होती. वाढत्या खड्ड्यांचा मुंबईकरांना अतोनात त्रास होत असून वाहतूककोंडीसह विविध समस्यांना सामोरे जावे लागते. खड्ड्यांची ही समस्या कायमस्वरूपी मिटविण्यासाठी मुंबईतील सर्वच रस्त्यांचे काँक्रिटीकरण करण्याचा निर्णय घेण्यात आला आहे. मात्र हे काम पूर्ण होण्यास आणखी दोन वर्षे लागणार आहेत. रस्त्यांची दुर्दशा होण्यास पालिका पावसाचे कारण देते. त्यावर उच्च न्यायालयानेही नाराजी व्यक्त केली आहे. न्यायालयात खड्ड्यांबाबत केलेल्या सादरीकरणात गेल्या सहा वर्षांतील पर्जन्यमानाची माहिती देण्यास आली आहे. त्यात गेल्यावर्षी कुलाब्यात १७०० ते ३२०० मिमी तर सांताक्रूझला २,२०० ते ३,५०० मिमी पावसाची नोंद होत असल्याचे म्हटले आहे. दरम्यान, मुंबईत या वर्षी जुलैमध्ये फार कमी वेळात अतिवृष्टीची नोंद झाली असून यंदाच्या एकूण पावसाचा वार्षिक कोटा जवळपास ८० टक्क्यांनी ओलांडला आहे. रस्ते बनवण्यासाठी वापरले जाणारे बिटुमन हे साहित्य पाण्यात टिकत नसल्याने खड्डे तयार होतात. यावर्षी जास्त खड्ड्यांची नोंद होण्याचे हे एक कारण आहे, असे एका पालिकेच्या अधिकाऱ्याने सांगितले.
मुंबईतील ९० टक्क्यांहून अधिक खड्डे हे काँक्रिटीकरण न झालेल्या डांबरी रस्त्यांतील आहेत. २०२० आणि २०२३च्या तुलनेत मुंबईतील काँक्रिटीकरण केलेल्या रस्त्यांची एकूण लांबी जवळपास दुप्पट झाली आहे. ही आकडेवारी पाहिली तर २०१९ आणि २०२३च्या आकडेवारीच्या तुलनेत खड्ड्यांची संख्याही निम्म्याने कमी झाल्याचा दावा या अधिकाऱ्याने केला आहे. गेल्या वर्षीपर्यंत पालिकेकडे पूर्व आणि पश्चिम द्रुतगती मार्ग नव्हते. ईस्टर्न फ्रीवेसह, हे मोठे रस्ते आहेत. या रस्त्यांवरील खड्ड्यांची जबाबदारी महापालिकेवर आहे. त्यामुळे खड्ड्यांची संख्या जास्त दिसत असल्याचे या अधिकाऱ्याने सांगितले.
मुंबईतील पाच वर्षांतील ‘खड्डे’वारी
वर्ष खड्डे बुजवले
२०१९ – ९४,९१८- ९४,८८२
२०२०- ६५,६१७- ६५,३९७
२०२१- ४३,४७८- ४३,२४९
२०२२- ३८,३१०- ३७,९८७
२०२३- ५९,५३३- ५९,२१३
मुंबईतील रस्त्यांची विभागणी (किमीमध्ये)
मुंबई महापालिका : २,०५०
एमएमआरडीए : ४५
एमएसआरडीसी : १५
म्हाडा : २२
मुंबई पोर्ट ट्रस्ट : ९
सार्वजनिक बांधकाम विभाग : १३
आरे कॉलनी : ४५
खासगी जमिनीवरील : २६
पाच वर्षांतील काँक्रिटीकरण
वर्ष काँक्रिटीकरण (किमी) एकूण काँक्रिटीकरण (किमी)
२०२०पर्यंत …. ६८७
२०२०-२१ ६६ ७५३
२०२१-२२ १६३ ८१९
२०२२-२३ १६६ ९८२
एकूण ३९५ ११४८
३१ मे २०२४ पर्यंत अपेक्षित काँक्रिटीकरण ३०० किमी