पुणे : प्रेमाला विरोध केल्यानंतर अल्पवयीन मुलाने साथीदारांच्या मदतीने प्रेयसीच्या मानलेल्या भावाचा खून केला होता. जुन्या कात्रज बोगद्याजवळ डोंगरावर तरुणाचा मृतदेह आढळून आला होता. याप्रकरणी राजगड पोलिसांत गुन्हा नोंद केला होता. पोलिसांनी प्रथम मृतदेहाची ओळख पटविली. तेव्हा मृतदेह सौरभ आठवलेचा असल्याची समोर आले. सौरभ १८ ऑगस्ट रोजी घरातून बेपत्ता झाल्याबाबत तक्रार दाखल होती. पुणे ग्रामीण पोलिसांनी या खूनाचा छडा लावत तिघांना अटक केली आहे. तर तीन अल्पवयीनांना ताब्यात घेतले आहे. जुन्या कात्रज बोगद्याजवळील डोंगरावर कात्रजमधील तरुणाचा खून केला होता. सौरभ स्वामी आठवले (वय २५, रा. पंचरत्न सोसायटी, मांगडेवाडी, कात्रज) असे खुन झालेल्या तरुणाचे नाव आहे. या प्रकरणी श्रीमंत अनिल गुज्जे (वय २१, रा. खंडोबा मंदिराजवळ, वडगाव मावळ), संगम नामदेव क्षीरसागर (वय १९, रा. वडगाव मावळ), नितीन त्र्यंबक शिंदे (वय १८, रा. गोकुळनगर, कात्रज, मूळ रा. खुठे गाव, ता. औसा, जि. लातूर) यांना अटक केली आहे. पोलिसांनी सौरभचे मित्र, नातेवाईकांकडे चौकशी केली. मात्र, त्यातून ठोस काही हाती लागले नव्हते. तांत्रिक तपासात सौरभचा खून अल्पवयीनांनी केल्याची माहिती पोलिस अंमलदार अक्षय नलावडे यांना मिळाली. त्यानूसार, कात्रज घाट परिसरात तिघांना पकडण्यात आले.
मांगडेवाडीत अल्पवयीन त्याच्या आत्याकडे राहत होता. त्याचे एका मुलीशी प्रेमसंबंध होते. सौरभही या भागात राहत होता. तो मुलीला बहीण मानायचा. तो तिला दररोज शाळेत सोडत. त्याने मुलीच्या प्रेमप्रकरणाची माहिती तिच्या आई-वडिलांना दिली. नंतर अल्पवयीन आत्याचे घर सोडून वडगाव मावळ येथे राहायला गेला. सौरभमुळे प्रेमसंबंधात अडथळे आल्याचा त्याचा समज झाला. त्यामुळे तो रागात होता. त्याने साथीदारांच्या मदतीने सौरभच्या खुनाचा कट रचला. सौरभला त्यांनी कात्रज बोगद्याजवळ भेटण्यास बोलविले. सौरभला डोंगरावर नेऊन आरोपींनी त्याच्यावर कोयत्याने वार केले. पोलिस तपासात ही माहिती मिळाल्यानंतर आरोपींना अटक करण्यात आली. त्यांच्याकडून तीन मोबाइल आणि दोन दुचाकी जप्त करण्यात आल्या. अटक केलेल्या तीन आरोपींना पोलीस कोठडीत ठेवण्याचे आदेश देण्यात आले आहेत. ही कारवाई पुणे ग्रामीण पोलिस अधीक्षक संदीपसिंग गिल यांच्या मार्गदर्शनाखाली राजगड पोलिस ठाण्याचे पोलिस निरीक्षक राजेश गवळी, सहायक निरीक्षक तुकाराम राठोड, उपनिरीक्षक अजित पाटील व त्यांच्या पथकाने केली आहे.