पुणे : तालुक्यातील विश्वासराव रणसिंग महाविद्यालय येथे विद्यार्थ्यांमध्ये रस्ते सुरक्षिततेबाबत जागरूकता निर्माण करण्यासाठी ‘युवकांसाठी रस्ते जागरूकता व सुरक्षितता प्रोत्साहन (प्रयास)’ या अभ्यासक्रमांतर्गत विशेष व्याख्यानाचे आयोजन करण्यात आले. संस्था सचिव वीरसिंह रणसिंग यांच्या प्रेरणेने आणि प्राचार्य डॉ. अशोक काळंगे यांच्या मार्गदर्शनाखाली हा कार्यक्रम पार पडला. विद्यार्थ्यांना वाहतूक नियम, रस्ते चिन्हे, परवाना प्रक्रिया आणि सुरक्षित वाहन चालविण्याच्या सवयींबाबत सखोल माहिती देणे हा या उपक्रमाचा मुख्य उद्देश होता. कार्यक्रमात विद्यार्थ्यांचा उत्स्फूर्त प्रतिसाद पाहायला मिळाला.
या वेळी उपप्रादेशिक परिवहन कार्यालय, बारामती येथील आरटीओ निरीक्षक प्रियंका सस्ते यांनी प्रमुख वक्ते म्हणून मार्गदर्शन केले. त्यांनी वाहतूक नियमांचे पालन, सिग्नलचे महत्त्व, हेल्मेटचा वापर आणि कायदेशीर बाबी याबाबत सविस्तर माहिती देत जबाबदार नागरिक बनण्याचे आवाहन केले. कार्यक्रमाचे अध्यक्षस्थान उपप्राचार्य डॉ. प्रशांत शिंदे यांनी भूषविले. व्याख्यानादरम्यान विद्यार्थ्यांनी विविध प्रश्न विचारून शंका निरसन केले. तसेच वाणिज्य व इंग्रजी विभाग प्रमुख डॉ. विलास बुवा यांनीही विद्यार्थ्यांना मार्गदर्शन केले. कार्यक्रमाचे प्रास्ताविक डॉ. तेजश्री हुंबे यांनी केले, सूत्रसंचालन प्रा. सुजाता निंबाळकर यांनी केले, तर आभार प्रदर्शन प्रा. ज्ञानेश गवळी यांनी मानले. या कार्यक्रमाला प्रा. ज्योत्स्ना गायकवाड, प्रा. विनायक शिंदे, प्रा. योगेश खरात, प्रा. महादेव माळवे यांच्यासह अनेक विद्यार्थी उपस्थित होते.
