वसई : वसई पूर्वेतील एका गोदामात विविध नामांकित कंपन्यांचे नाव वापरून बनावट घरगुती उत्पादने तयार करून त्याची विक्री केली जात असल्याचा धक्कादायक प्रकार समोर आला आहे. या प्रकरणी नायगाव पोलीस ठाण्यात गुन्हा दाखल करण्यात आला आहे.
वसई पूर्वेच्या भागात कामण देवदळ परिसर आहे. मागील काही वर्षात या भागात विविध प्रकारचे कारखाने उभे राहिले आहेत. तर याच कारखान्यातील गाळ्यांमध्ये बेकायदेशीर व्यवसाय केले जात असल्याचे प्रकार उघडकीस येत असताना याच भागातील ममता कंपाऊंड येथील गाळ्यात नामांकित कंपन्यांचे नाव व लोगो वापरून बनावट उत्पादने तयार केली जात असल्याचा प्रकार उघडकीस आला आहे. फिल्ड मॅनेजर म्हणून कार्यरत असणारे शितलकुमार झा यांच्या निदर्शनास हा प्रकार आला होता. गुरुवारी दाखल करण्यात आलेल्या तक्रारीनंतर सोमवारी नायगाव पोलिसांनी याबाबत गुन्हा दाखल केला. त्यानंतर पोलिसांकडून अनधिकृत गाळ्याच्या ठिकाणी छापा टाकून बनावट माल जप्त केला. यात हँडवाश, टूथपेस्ट, जंतुनाशक, साफसफाईसाठी वापरण्यात येणारे फिनाईल, भांडी घासण्याचा साबण, केसांना लावण्याचे तेल असा बनावट माल, नामांकित कंपनीच्या नावाचे आणि लोगोचे स्टिकर, हुबेहूब दिसणाऱ्या उत्पादनांच्या बनावट बाटल्या व बुचं असा ८ लाख ८० हजार रुपयांचा माल जप्त करण्यात आला आहे. या प्रकरणी संबंधितांवर कॉपीराईट कायदा सन १९५६ चे कलम ५१, ६३, ६४ अंतर्गत गुन्हा दाखल करण्यात आला असून पुढील तपास सुरू आहे.
