मुंबई : मुंबई शहर अल्पावधीतच ‘टेक्नो कॉन्सर्ट हब’ म्हणून उदयास आले असून, येथे दर आठवड्याच्या शेवटी—विशेषतः शुक्रवार ते रविवार—आंतरराष्ट्रीय डीजे आणि बॅण्डचे कार्यक्रम मोठ्या प्रमाणावर आयोजित केले जातात. मात्र, गोरेगाव येथील नेस्को सेंटरमध्ये झालेल्या एका कॉन्सर्टदरम्यान अंमली पदार्थांच्या अतिसेवनामुळे दोन तरुणांचा मृत्यू झाल्यानंतर पोलिस प्रशासन अधिक सतर्क झाले आहे. या घटनेनंतर शहरातील सर्व टेक्नो कार्यक्रमांवर पोलिसांनी करडी नजर ठेवण्यास सुरुवात केली असून, तपासणी मोहिमा राबवल्या जात आहेत. याच पार्श्वभूमीवर शिवडी येथे होणारा एक मोठा कॉन्सर्ट ऐनवेळी रद्द करावा लागला, ज्यामुळे आयोजकांमध्येही चिंता निर्माण झाली आहे. वाढत्या कार्यक्रमांसोबत सुरक्षा व्यवस्थेची गरज अधिक प्रकर्षाने समोर येत आहे.
दरम्यान, लोअर परेल, वांद्रे, अंधेरी आणि बीकेसीसारख्या भागांमध्ये नियमित टेक्नो नाईट्स आणि मोठे म्युझिक इव्हेंट्स होत असून, काही ठिकाणी अंमली पदार्थांचे सेवन आणि विक्री होत असल्याच्या तक्रारी पुढे आल्या आहेत. मुख्यमंत्री देवेंद्र फडणवीस यांनी अशा बेकायदेशीर कृत्यांवर कठोर कारवाई करण्याचे निर्देश दिल्यानंतर पोलिसांनी या कार्यक्रमांवर विशेष लक्ष केंद्रीत केले आहे. उच्च आवाजाच्या मर्यादेपलीकडील संगीत, बंदिस्त जागा आणि त्यातून निर्माण होणारा ताण सहन करण्यासाठी काहीजण अंमली पदार्थांचा वापर करत असल्याचेही पोलिस सूत्रांनी नमूद केले आहे. येत्या काळात मोठे कॉन्सर्ट आणि इलेक्ट्रॉनिक म्युझिक फेस्टिवल्स नियोजित असताना, तरुणांच्या सुरक्षिततेसाठी कडक नियमांची अंमलबजावणी करणे आणि अंमली पदार्थांवर नियंत्रण ठेवणे हे प्रशासनासमोर मोठे आव्हान ठरत आहे.
