मुंबई : सर्वसामान्यांची हक्काची आणि किफायतशीर प्रवास म्हणून ओळखल्या जाणाऱ्या एसटी बसमध्ये आता महत्वपूर्ण बदल केले जाणार आहेत. त्यानुसार, एसटी बस कुठपर्यंत पोहोचली आहे, याचे लाईव्ह लोकेशन आता प्रवाशांना आपल्या मोबाईलवर समजणार असून, त्यासाठी महामंडळ APP विकसित करत असल्याची माहिती परिवहनमंत्री प्रताप सरनाईक यांनी दिली. येत्या महिन्याभरात हे APP कार्यान्वित होणार असल्याचेही त्यांनी सांगितले.
एसटी महामंडळ आपल्या प्रवाशांना अत्याधुनिक सुविधा देण्यासाठी सज्ज झाले आहे. येत्या महिन्याभरात एसटीचा ठावठिकाणा मोबाईल अॅपद्वारे कळणार असल्याची ग्वाही परिवहन मंत्री प्रताप सरनाईक यांनी दिली आहे. या APP मुळे प्रवाशांना लोकल ट्रेनप्रमाणे बस कुठपर्यंत पोहोचली आहे, हे थेट मोबाईलवर पाहता येईल. मुंबईत महामंडळाच्या मुख्यालयात अध्यक्षपद स्वीकारल्यानंतर सरनाईक यांनी ही घोषणा केली. ते म्हणाले, ‘सर्व 15 हजार बसगाड्यांमध्ये जीपीएस यंत्रणा बसवण्याचे काम अंतिम टप्प्यात आहे. येत्या दोन महिन्यांत हे पूर्ण होईल, तर APP पुढील महिन्यातच उपलब्ध होईल’.
दरम्यान, सध्या १२ हजार गाड्यांमध्ये जीपीएस बसवले असून, उर्वरित ३ हजार बसचे काम लवकरच पूर्ण होणार आहे. यापूर्वी २०१९ मध्ये तत्कालीन परिवहनमंत्री दिवाकर रावते यांनी असा उपक्रम हाती घेतला होता. APP द्वारे प्रवासी बसचे नेमके स्थान, मार्ग, आणि आगमन प्रस्थान वेळ जाणून घेऊ शकतील. आपत्कालीन परिस्थितीत मदत मिळवण्यासाठी APP मध्ये विशेष सुविधाही असेल. मंत्री सरनाईक यांनी ठेकेदाराला जीपीएस बसवण्यात उशीर झाल्यास कठोर कारवाईचा इशारा दिला आहे. नवीन बसना जीपीएस आणि सीसीटीव्हीसह सुसज्ज करण्याचे निर्देश दिले आहेत. ही सुविधा प्रवाशांचा वेळ वाचवेल आणि प्रवास अधिक सुकर करेल. दररोज 60 लाख प्रवाशांना सेवा देणाऱ्या महामंडळाच्या या पावलामुळे सार्वजनिक वाहतूक व्यवस्थेत क्रांती येण्याची अपेक्षा आहे. प्रवाशांनी या APP चे स्वागत केले असून, लवकरात लवकर सुविधा उपलब्ध व्हावी, अशी मागणी केली आहे.
