मुंबई : शहरातील मल्टिप्लेक्स सिनेमागृहांमध्ये मराठी चित्रपटांना पुरेशा प्रमाणात पडदे आणि योग्य वेळा मिळत नसल्याच्या तक्रारी सातत्याने पुढे येत असताना, मुंबई महानगरपालिकेने याबाबत महत्त्वाचा आणि सकारात्मक निर्णय घेतला आहे. मराठी चित्रपटांना योग्य व्यासपीठ मिळावे, स्थानिक चित्रपटसृष्टीला चालना मिळावी आणि प्रेक्षकांना अधिकाधिक मराठी चित्रपट पाहण्याची संधी मिळावी या उद्देशाने स्वतंत्र बहुपडदा (मल्टिप्लेक्स) चित्रपटगृहे उभारण्याचा प्रस्ताव पुढे आणण्यात आला आहे. सन २०२६-२७ च्या तब्बल ८०,९५२ कोटी रुपयांच्या अर्थसंकल्पाला स्थायी समितीने मंजुरी देताना या योजनेसाठी प्रथमच एक कोटी रुपयांची तरतूद करण्यात आली आहे. विशेष म्हणजे, महापालिका प्रशासनाने मूळ अर्थसंकल्पात यासाठी कोणतीही तरतूद केलेली नसतानाही स्थायी समितीने आपल्या अधिकारात हा निर्णय घेतला आहे, हे या निर्णयाचे वैशिष्ट्य मानले जात आहे. सध्या शहरातील बहुतांश मल्टिप्लेक्समध्ये हिंदी आणि इतर भाषांतील चित्रपटांना प्राधान्य दिले जाते, तर मराठी चित्रपटांना फारच कमी पडदे किंवा मर्यादित शो दिले जातात. त्यामुळे अनेक चांगले मराठी चित्रपट प्रेक्षकांपर्यंत पोहोचत नाहीत, अशी नाराजी निर्माते, दिग्दर्शक आणि वितरक यांच्याकडून व्यक्त केली जात आहे.
या पार्श्वभूमीवर सत्ताधारी भाजपा-शिवसेना महायुतीने पुढाकार घेत स्थायी समितीच्या माध्यमातून आर्थिक तरतूद करून हा विषय पुढे नेला आहे. सुरुवातीला एक कोटी रुपयांची तरतूद करण्यात आली असली, तरी प्रत्यक्षात चित्रपटगृहे उभारण्याचा अंतिम निर्णय घेतल्यानंतर या निधीत लक्षणीय वाढ होण्याची शक्यता वर्तवली जात आहे. या मल्टिप्लेक्ससाठी योग्य जागा निश्चित करण्यासाठी लवकरच सविस्तर अभ्यास केला जाणार असून, मराठी भाषिकांची संख्या अधिक असलेल्या लालबाग, परळ, दादर, वरळी, गिरगाव, माझगाव, शिवडी, चेंबूर, गोरेगाव, जोगेश्वरी आणि दहिसर या भागांना प्राधान्य दिले जाणार आहे. या भागांमध्ये उपलब्ध असलेल्या मोकळ्या जागांचा शोध घेऊन प्रकल्प राबवण्याचा विचार आहे. स्थायी समितीचे अध्यक्ष प्रभाकर शिंदे यांनी सांगितले की, या आर्थिक वर्षातच या प्रकल्पासाठी महापालिका प्रशासनाकडे सातत्याने पाठपुरावा केला जाईल आणि लवकरात लवकर प्रत्यक्ष कामाला सुरुवात करण्याचा प्रयत्न केला जाईल. या निर्णयामुळे मराठी चित्रपटसृष्टीला मोठा दिलासा मिळण्याची शक्यता असून, स्थानिक संस्कृती आणि भाषेला बळकटी मिळण्यासही मदत होणार आहे.
