ठाणे : ‘प्रत्येकाने आपल्या घरासह शहरदेखील स्वच्छ राहील असा गुण अंगीकारला पाहिजे, तरच आपले शहर, राज्य व पर्यायाने देश स्वच्छ होण्यास मदत होणार आहे. संपूर्ण महाराष्ट्रात स्वच्छता पंधरवडा साजरा होत आहे, यामध्ये सर्व नागरिकांनीदेखील हिरीरीने सहभाग घ्यावा,’ असे आवाहन खासदार नरेश म्हस्के यांनी केले आहे. दरवर्षी १७ सप्टेंबर ते २ ऑक्टोबर या कालावधीत सर्वत्र ‘स्वच्छता पंधरवडा’ साजरा केला जातो. या अनुषंगाने स्वभाव स्वच्छता व संस्कार स्वच्छता ही संकल्पना ठाणे महापालिका राबवत असून या उपक्रमांतर्गत आज ठाणे रेल्वे स्थानक परिसराची स्वच्छता करण्यात आली. खासदार नरेश म्हस्के यांच्या उपस्थितीत संपूर्ण रेल्वे स्थानक परिसराची सफाई करण्यात आली. या वेळी खासदार नरेश म्हस्के, आमदार संजय केळकर, निरंजन डावखरे, महापालिका आयुक्त सौरभ राव यांच्यासह महापालिका अधिकारी कर्मचारी, रेल्वेचे कर्मचारी, विविध महाविद्यालयातील राष्ट्रीय सेवा योजनेचे विद्यार्थी, तसेच महापालिकेचे सफाई कर्मचारी मोठ्या संख्येने उपस्थित होते.
ठाणे महापालिकेच्या माध्यमातून ठाणे स्थानक परिसरात महापालिका, ठाणे रेल्वे प्रशासनाचे कर्मचारी, तसेच महाविद्यालयीन विद्यार्थी यांनी एकत्र येऊन पंतप्रधान नरेंद्र मोदी यांची संकल्पना पूर्णत्वास नेण्याच्या दृष्टिकोनातून संपूर्ण ठाणे स्थानक परिसराची सफाई केली. राष्ट्रपिता महात्मा गांधी यांनी स्वच्छतेचा धडा आपल्याला दिला असून त्याचे रूपांतर पंतप्रधान नरेंद्र मोदी यांनी चळवळीमध्ये केले आहे. स्वच्छता हा प्रत्येकाचा स्वभाव व संस्कार झाला पाहिजे, असे आमदार संजय केळकर यांनी नमूद केले. पालिकेने या स्वच्छता पंधरवड्याचे निमित्त साधून १५ दिवसांत १५० उपक्रम विविध ठिकाणी आयोजित केले आहेत. या वेळी उपस्थित सर्व नागरिकांना स्वच्छतेची शपथ देण्यात आली.