पुणे : मोशी कचरा डेपो दुर्घटनेप्रकरणी प्राथमिक चौकशी तातडीने पूर्ण करून संबंधित ठेकेदार कंपनीविरुद्ध गुन्हा दाखल करण्याच्या सूचना पिंपरी-चिंचवड महापालिकेचे आयुक्त डॉ. विजय सूर्यवंशी यांनी अधिकाऱ्यांना दिल्या आहेत. रविवारी त्यांनी महापालिकेतील वरिष्ठ अधिकाऱ्यांची बैठक घेऊन दुर्घटनेचा आढावा घेतला. बैठकीला अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, सहआयुक्त मनोज लोणकर यांच्यासह विविध विभागांचे अधिकारी उपस्थित होते.
मोशी कचरा डेपो येथे ८ जुलै रोजी दुपारी साडेएकच्या सुमारास कचऱ्याचा प्रचंड ढीग इमारतीवर कोसळल्याने भीषण दुर्घटना घडली होती. इमारतीत आणि बाहेरील ढिगाऱ्यात अडकलेल्या कामगारांच्या सुटकेसाठी एनडीआरएफ, भारतीय सेना, महापालिका व पीएमआरडीए अग्निशमन दल, पोलीस प्रशासन तसेच इतर यंत्रणांनी संयुक्त बचावमोहीम राबवली. दुर्घटनेनंतर पाच कामगार स्वतः बाहेर पडले, तर उर्वरित १८ जणांपैकी नऊ कामगारांना बचाव पथकाने जिवंत बाहेर काढण्यात यश मिळाले. तब्बल ८४ तास चाललेल्या शोध आणि बचाव मोहिमेदरम्यान चौथ्या दिवशी इमारतीत अडकलेल्या सात आणि इमारतीशेजारील कचऱ्याच्या ढिगाऱ्यात अडकलेल्या एका अशा आठ कामगारांचे मृतदेह बाहेर काढण्यात आले. यापूर्वी ९ जुलै रोजी भावेश वाणी यांचा मृत्यू झाला होता. या दुर्घटनेत अक्षय सावंत, सुनील कोरके, सन्नी माने, महेश कुंभार, नागेश गायकवाड, रणजीत पाटील, राहुल गायकवाड आणि अखेरीस रविवारी मध्यरात्री वामन कसबे यांचे मृतदेह हाती लागले. या दुर्घटनेतील मृतांचा एकूण आकडा नऊवर पोहोचला आहे. अडकलेल्या सर्व कामगारांचा शोध पूर्ण झाल्यानंतर रविवारी मध्यरात्री दोन वाजता ८४ तास चाललेली बचावमोहीम थांबविण्यात आली. दरम्यान, आयुक्त डॉ. विजय सूर्यवंशी यांनी महापालिकेच्या पर्यावरण विभागासह संबंधित ठेकेदार कंपनी अँटोनी लारा रिन्युएबल यांना नोटीस बजावण्याचे आदेश दिले आहेत. तसेच दुर्घटनेच्या सखोल चौकशीचे निर्देश देत जबाबदारी निश्चित करून पुढील कायदेशीर कारवाई तातडीने करण्याचे आदेशही प्रशासनाला दिले आहेत.
