वृत्तसंस्था : जगभरातील कोट्यवधी वापरकर्त्यांच्या आवडीच्या आणि मोफत वापरल्या जाणाऱ्या सोशल मीडिया प्लॅटफॉर्मना आता सशुल्क स्वरूप येण्यास सुरुवात झाली आहे. Meta Platforms या कंपनीने इन्स्टाग्राम, फेसबुक आणि व्हॉट्सॲपसाठी नवीन प्रीमियम फीचर्स जाहीर केले असून, त्यासाठी वापरकर्त्यांना दरमहा शुल्क भरावे लागणार आहे. कंपनीच्या उत्पादन प्रमुख नाओमी ग्लीट यांनी इन्स्टाग्रामवर व्हिडिओ पोस्ट करून या नव्या प्लॅन्सची घोषणा केली. मेटाने ‘इन्स्टाग्राम प्लस’, ‘फेसबुक प्लस’, ‘व्हॉट्सॲप प्लस’ आणि ‘मेटा वन’ असे विविध पर्याय सादर केले आहेत. कंपनीने स्पष्ट केले आहे की, केवळ जाहिरातींवर अवलंबून न राहता आता सब्सक्रिप्शनमधूनही महसूल मिळवण्यावर भर दिला जाणार आहे. या नव्या मॉडेलनुसार, प्रगत आणि विशेष फीचर्स केवळ पैसे देणाऱ्या वापरकर्त्यांसाठी उपलब्ध असतील.
‘इन्स्टाग्राम प्लस’ आणि ‘फेसबुक प्लस’साठी दरमहा ३.९९ डॉलर (सुमारे ३८७ रुपये) शुल्क आकारले जाणार असून, ‘व्हॉट्सॲप प्लस’साठी २.९९ डॉलर (सुमारे २९० रुपये) शुल्क ठेवण्यात आले आहे. भारतातील अधिकृत शुल्क अद्याप जाहीर झालेले नसले तरी ते लवकरच जाहीर होण्याची शक्यता आहे. इन्स्टाग्राम प्लस वापरकर्त्यांना स्टोरीज किती वेळा पुन्हा पाहिल्या गेल्या याची माहिती, गुप्तपणे स्टोरी पाहण्याची सुविधा, स्टोरीजचा कालावधी वाढवणे, प्रोफाईल कस्टमायझेशन, नवीन इमोजी आणि खास फॉन्ट्स यांसारखी फीचर्स मिळणार आहेत. तर व्हॉट्सॲप प्लसमध्ये चॅट कस्टमायझेशन, नवीन थीम्स, प्रीमियम स्टिकर्स, खास रिंगटोन आणि चॅट पिनिंगसारख्या सुविधा दिल्या जाणार आहेत. याशिवाय ‘मेटा वन’ नावाचा स्वतंत्र AI आणि बिझनेस प्लॅनही सादर करण्यात आला आहे. या प्लॅनमध्ये ७७५ रुपये आणि १९३९ रुपये प्रति महिना असे दोन सशुल्क पर्याय उपलब्ध असतील. यामध्ये इमेज जनरेशन, व्हिडिओ क्रिएशन आणि AI टूल्सचा अधिक वापर करण्याची सुविधा दिली जाणार आहे. तसेच कंटेंट क्रिएटर्स आणि व्यावसायिकांसाठी व्हेरिफिकेशन, अधिक पोहोच, प्रगत ॲनालिटिक्स आणि ग्राहक सहाय्य यांसारख्या सुविधा असलेले स्वतंत्र प्लॅनही आणण्यात आले आहेत. AI तंत्रज्ञानासाठी मोठ्या प्रमाणावर होणारा खर्च, डेटा सेंटर उभारणी आणि वाढत्या आर्थिक दबावामुळे मेटाने हे पाऊल उचलल्याचे मानले जात आहे. कंपनीने अलीकडेच मोठ्या प्रमाणावर नोकरकपातही केली आहे. सोशल मीडिया क्षेत्रात ‘एक्स’ने सशुल्क सेवा सुरू केल्यानंतर महसुलात वाढ झाल्याने त्याच धर्तीवर मेटानेही प्रीमियम सेवा सुरू केली असून, त्यातून मोठा महसूल मिळण्याची कंपनीला अपेक्षा आहे.
