मुंबई (सुरेश गायकवाड) : मेटाबॉलिक आरोग्य, पोषणशास्त्र आणि डायटेटिक्स क्षेत्रात संशोधन, शिक्षण आणि व्यावसायिक नेतृत्वाला चालना देण्यासाठी स्थापन करण्यात आलेल्या International Association of Dietitians for Metabolic Health and Nutrition (IADMN) या जागतिक वैज्ञानिक संस्थेचा विशेष सोहळा मुंबईतील ग्लेनेगल्स हॉस्पिटल येथे पार पडला. भारतातून जागतिक स्तरावर उभे राहत असलेल्या या व्यासपीठामुळे कार्यक्रमाला विशेष महत्त्व प्राप्त झाले. २८ ऑक्टोबर २०२५ रोजी स्थापन झालेली IADMN ही स्वतंत्र वैज्ञानिक संस्था असून, जगभरातील आहारतज्ज्ञ, संशोधक, चिकित्सक आणि शिक्षणतज्ज्ञांना एकत्र आणून मेटाबॉलिक आरोग्य क्षेत्रात ज्ञानविनिमय आणि पुराव्यावर आधारित संशोधनाला प्रोत्साहन देणे हे संस्थेचे उद्दिष्ट आहे. कार्यक्रमाला डॉ भरत शाह आणि सलोमी बेंजामिन मानद संरक्षक म्हणून उपस्थित होते. तसेच जमुरुड पटेल, डॉ सुखदा भट्टे, डॉ रुबी साऊंड आणि अन्य मान्यवरांच्या उपस्थितीने कार्यक्रमाला विशेष गौरव प्राप्त झाला.
कार्यक्रमातील प्रमुख आकर्षण ठरलेल्या व्याख्यानात डॉ. भारत शाह यांनी “Metabolic Health and Kidney Disease” या विषयावर मार्गदर्शन करताना मधुमेह, स्थूलता आणि उच्च रक्तदाब यांसारख्या विकारांमुळे किडनीच्या आजारांचा धोका वाढत असल्याचे स्पष्ट केले. योग्य आहार आणि निरोगी जीवनशैलीमुळे मूत्रपिंड निकामी होण्यापासून बचाव शक्य असल्याचे त्यांनी सांगितले. त्यानंतर झालेल्या पॅनेल चर्चेत मेटाबॉलिक सिंड्रोम, वजन व्यवस्थापन, किडनी विकार आणि जीवनशैलीतील बदल यांवर सखोल चर्चा झाली. आहारतज्ज्ञांची भूमिका केवळ सल्लागारापुरती मर्यादित नसून, मधुमेह, स्थूलता, फॅटी लिव्हर, पीसीओएस आणि हृदयरोगांसारख्या वाढत्या आजारांच्या प्रतिबंध आणि व्यवस्थापनात ते महत्त्वाचे क्लिनिकल भागीदार बनत असल्याचे अधोरेखित करण्यात आले. IADMN चे उद्दिष्ट भारतातील आहारतज्ज्ञांना जागतिक व्यासपीठ उपलब्ध करून देत संशोधन, शिक्षण आणि नवकल्पनांमध्ये नेतृत्व निर्माण करणे हे असून, मुंबईतून सुरू झालेली ही संस्था जागतिक स्तरावर महत्त्वाचे केंद्र बनेल, असा विश्वास यावेळी व्यक्त करण्यात आला.
