नागपूर : पंतप्रधान नरेंद्र मोदी आणि इटलीच्या पंतप्रधान जॉर्जिया मेलोनी यांच्यातील मैत्रीची गेल्या काही वर्षांपासून आंतरराष्ट्रीय स्तरावर सातत्याने चर्चा होत आहे. सप्टेंबर २०२३ मध्ये नवी दिल्ली येथे झालेल्या G20 Summit 2023 दरम्यान मेलोनी यांनी मोदींसोबतचा सेल्फी व्हिडिओ सोशल मीडियावर शेअर करत “मेलोडी टीम” असा उल्लेख केला होता. ‘मोदी’ आणि ‘मेलोनी’ या नावांपासून तयार झालेला ‘मेलोडी’ हा शब्द त्यानंतर सोशल मीडियावर मोठ्या प्रमाणावर व्हायरल झाला. पुढे विविध आंतरराष्ट्रीय परिषदांमध्ये दोन्ही नेते एकत्र दिसल्यानंतर हा उल्लेख वारंवार चर्चेत राहिला. अलीकडे मोदी यांच्या इटली दौऱ्यादरम्यान या चर्चेला पुन्हा उधाण आले. या दौऱ्यात मोदी यांनी मेलोनी यांना ‘मेलोडी’ चॉकलेटची भेट दिल्याची माहिती समोर आल्यानंतर सोशल मीडियावर अनेकांनी त्यासंदर्भातील छायाचित्रे आणि पोस्ट शेअर केल्या. राजकीय संबंधांच्या पलीकडे जाऊन दोन्ही नेत्यांमधील मैत्रीपूर्ण संवाद आणि अनौपचारिक क्षण यामुळे ‘मेलोडी’ हा शब्द पुन्हा चर्चेचा विषय ठरला आहे.
पंतप्रधान मोदी यांनी पाच देशांच्या दौऱ्यात विविध जागतिक नेत्यांना दिलेल्या भेटवस्तूंमधून भारताच्या समृद्ध कला, संस्कृती आणि वारशाचे दर्शन घडवले. इटलीच्या पंतप्रधान मेलोनी यांना ‘मेलोडी’ चॉकलेटसोबतच आसाममधील प्रसिद्ध मूगा सिल्क शाल आणि मणिपूरच्या दुर्मीळ शिरुई लिली फुलावर आधारित रेशमी स्टोलही भेट देण्यात आला. ‘गोल्डन सिल्क ऑफ आसाम’ म्हणून ओळखल्या जाणाऱ्या मूगा सिल्कला त्याच्या नैसर्गिक सोनेरी झळाळी आणि टिकाऊपणामुळे विशेष महत्त्व आहे. तर शिरुई लिली हे जगात केवळ मणीपुरमध्ये आढळणारे दुर्मीळ फुल मानले जाते. भारताच्या पारंपरिक हस्तकला आणि सांस्कृतिक वारशाचे प्रतीक असलेल्या या भेटवस्तूंमुळे भारताची ‘सॉफ्ट पॉवर’ अधोरेखित झाल्याची चर्चा आंतरराष्ट्रीय स्तरावर होत आहे.
