रत्नागिरी : दिवाळीनिमित्त चाकरमानी आणि प्रवाशांची गैरसोय टाळण्यासाठी रत्नागिरी एसटी विभागाने विशेष नियोजन केले आहे. ६ नोव्हेंबर ते १४ नोव्हेंबर या कालावधीत पश्चिम महाराष्ट्र, मराठवाडा आणि विदर्भातील विविध शहरांसाठी दररोज ३५ विशेष बसेस सोडण्यात येणार असून, एकूण ३५० अतिरिक्त एसटी बसेस प्रवाशांच्या सेवेत धावतील. या विशेष फेऱ्यांसाठी ऑनलाइन तिकीट आरक्षणालाही सुरुवात करण्यात आली आहे.
दिवाळीच्या सुट्ट्यांमध्ये नोकरी, व्यवसाय आणि शिक्षणासाठी रत्नागिरी जिल्ह्यात वास्तव्यास असलेले नागरिक मोठ्या प्रमाणावर आपल्या गावी परततात. ही वाढलेली प्रवासी गर्दी लक्षात घेऊन एसटी प्रशासनाने विशेष बससेवा सुरू करण्याचा निर्णय घेतला आहे. पुणे, सातारा, सांगली, कोल्हापूर, सोलापूर, धाराशिव, बीड, नागपूर, अमरावती, अकोला, वाशिम, यवतमाळ, चंद्रपूर, बुलढाणा आणि वर्धा या शहरांसाठी विशेष बसेस धावणार आहेत. एसटी प्रशासनाने प्रवाशांना वेळेत ऑनलाइन आरक्षण करून प्रवास निश्चित करण्याचे आवाहन केले आहे. दिवाळीच्या काळात महिलांना, तरुणींना आणि ६५ वर्षांवरील ज्येष्ठ नागरिकांना तिकीटदरात ५० टक्के सवलत, तर ७५ वर्षांवरील ज्येष्ठांना मोफत प्रवास मिळणार आहे. मात्र, या सवलतींचा लाभ घेण्यासाठी एनसीएमसी (NCMC) कार्ड बंधनकारक आहे. त्यामुळे प्रवाशांनी प्रवासापूर्वी कार्ड सोबत ठेवावे आणि आवश्यक तेवढे रिचार्ज करून घ्यावे. कार्ड नसल्यास पूर्ण तिकीट आकारले जाईल, असे एसटी विभागाने स्पष्ट केले आहे.
