नवी दिल्ली : भारतीय विशिष्ट ओळख प्राधिकरण यांनी जुना ‘mAadhaar’ अनुप्रयोग ३० जूनपासून बंद करण्यात आल्याची घोषणा केली असून, नागरिकांनी तातडीने नवीन ‘‘Aadhaar’ अनुप्रयोग वापरण्यास सुरुवात करण्याचे आवाहन केले आहे. जुना अनुप्रयोग उघडल्यावर तो बंद करण्यात आल्याचा संदेश दिसत असून, आता आधारशी संबंधित सर्व डिजिटल सेवा नव्या अनुप्रयोगातून उपलब्ध होणार आहेत. त्यामुळे केवळ नवीन अनुप्रयोग दूरध्वनीवर स्थापित करणे पुरेसे नसून, त्याची संपूर्ण नोंदणी आणि आवश्यक पडताळणी पूर्ण करणे अत्यंत महत्त्वाचे आहे. अन्यथा आधारशी संबंधित विविध सेवा वापरताना अडचणी येऊ शकतात. नवीन अनुप्रयोगामध्ये अधिक सुरक्षितता, गोपनीयता आणि आधुनिक सुविधा देण्यात आल्या असून, चेहऱ्याद्वारे ओळख पडताळणी, द्रुत प्रतिसाद संकेताद्वारे आधार माहितीची देवाणघेवाण, जैविक ओळख सुरक्षित ठेवण्याची सुविधा आणि इतर अनेक डिजिटल सेवा उपलब्ध करून देण्यात आल्या आहेत. जुन्या अनुप्रयोगाऐवजी या नव्या प्रणालीवर स्थलांतर करण्याचे आवाहन प्राधिकरणाने केले आहे. तसेच, जुना अनुप्रयोग बंद झाल्यामुळे आधार क्रमांक किंवा आधारमधील नोंदी नष्ट होणार नाहीत; मात्र सेवांचा लाभ घेण्यासाठी नवीन अनुप्रयोगावर नोंदणी करणे आवश्यक आहे.
नवीन अनुप्रयोगची नोंदणी करण्यासाठी प्रथम आपल्या भ्रमणध्वनीतील अधिकृत अनुप्रयोग भांडारातून ‘Aadhaar’ या नावाचा भारतीय विशिष्ट ओळख प्राधिकरणाचा अधिकृत अनुप्रयोग डाउनलोड करावा. त्यानंतर अनुप्रयोग सुरू करून पसंतीची भाषा निवडावी. हा अनुप्रयोग अनेक भारतीय भाषांमध्ये उपलब्ध आहे. पुढील टप्प्यात अटी व शर्ती स्वीकारून कॅमेरा आणि दूरध्वनी क्रमांकाशी संबंधित आवश्यक परवानग्या द्याव्या लागतील. त्यानंतर १२ अंकी आधार क्रमांक नोंदवून आधारशी जोडलेला भ्रमणध्वनी क्रमांक असलेले सिमकार्ड निवडावे. त्यानंतर प्रणाली आपोआप पडताळणीची प्रक्रिया पूर्ण करेल. पुढील टप्प्यात चेहऱ्याद्वारे ओळख पडताळणी करावी लागेल. यासाठी पुरेशा प्रकाशात चेहरा कॅमेऱ्यासमोर ठेवून पडद्यावर दिलेल्या सूचनांचे पालन करावे. ही प्रक्रिया पूर्ण होताच संबंधित व्यक्तीची आधार माहिती नव्या अनुप्रयोगात नोंदवली जाईल आणि सर्व डिजिटल सेवांचा वापर करता येईल. प्राधिकरणाने नागरिकांना केवळ अधिकृत अनुप्रयोगच वापरण्याचे आवाहन केले असून, आधारशी संबंधित सेवांचा अखंड लाभ मिळण्यासाठी नवीन अनुप्रयोग तातडीने सुरू करण्याचा सल्ला दिला आहे.
नवीन आधार अॅप सेटअप करण्याची प्रोसेस :
- अॅप डाऊनलोड करा: सर्वात आधी जुने mAadhaar अॅप अनइंस्टॉल करा. त्यानंतर Google Play Store किंवा Apple App Store वरून UIDAI चे अधिकृत ‘Aadhaar’ अॅप डाऊनलोड करा.
- भाषा निवडा: अॅप ओपन करून तुमची आवडती भाषा निवडा (हे अॅप १२ भारतीय भाषांना सपोर्ट करते)
- परवानग्या द्या: अॅपने मागितलेल्या अटी मान्य करा आणि कॅमेरा व सिम कार्डची (SIM) परमिशन द्या
- आधार नंबर टाका: तुमचा १२ अंकी आधार नंबर किंवा व्हर्च्युअल आयडी (VID) नोंदवा
- सिम कार्ड व्हेरिफिकेशन: तुमच्या फोनमध्ये दोन सिम कार्ड असल्यास, आधार कार्डशी लिंक असलेला रजिस्टर्ड मोबाईल नंबरचा SIM स्लॉट निवडा. अॅप आपोआप SMS द्वारे नंबर व्हेरिफाय करेल
- ओटीपी (OTP) प्रविष्ट करा: तुमच्या मोबाईलवर आलेला वन-टाइम पासवर्ड (OTP) टाका
- फेस ऑथेंटिकेशन (Face Scan): चांगल्या प्रकाशाच्या ठिकाणी फोन चेहऱ्यासमोर धरून स्क्रीनवर दिलेल्या सूचनांनुसार चेहरा स्कॅन करा
- ६-अंकी MPIN सेट करा: अॅपच्या सुरक्षिततेसाठी तुमच्या आवडीचा ६-अंकी गुपित पासवर्ड (MPIN) तयार करा
