वृत्तसंस्था : रिलायन्स जिओने ग्राहकांसाठी अवघ्या १५ रुपयांत २४ तासांचा अनलिमिटेड 5G डेटा देणारा नवीन डेटा पॅक सादर केला आहे. कमी किमतीतील हा पॅक देशातील सर्वात स्वस्त 5G डेटा पर्यायांपैकी एक मानला जात असून, अचानक मोठ्या प्रमाणात इंटरनेटची गरज भासणाऱ्या ग्राहकांसाठी तो उपयुक्त ठरणार आहे. मोठ्या फाईल्स डाउनलोड करणे, हाय-क्वालिटी व्हिडिओ स्ट्रीमिंग करणे किंवा नियमित डेटा मर्यादा संपल्यानंतर अतिरिक्त इंटरनेट वापरण्यासाठी हा पॅक वापरता येणार आहे. हा पॅक केवळ डेटासाठी असून त्यामध्ये व्हॉइस कॉलिंग किंवा एसएमएसची सुविधा उपलब्ध नाही. त्यामुळे तो अ‍ॅड-ऑन डेटा पॅक म्हणूनच वापरता येईल. मात्र, या पॅकचा लाभ घेण्यासाठी ग्राहकांकडे 5G सपोर्ट असलेला स्मार्टफोन आणि जिओचे ट्रू 5G नेटवर्क उपलब्ध असलेल्या परिसरात वास्तव्य असणे आवश्यक आहे. तसेच, जिओच्या नियमानुसार ग्राहकाच्या क्रमांकावर किमान दररोज २ जीबी डेटा देणारा वैध बेस प्लॅन, जसे की ३४९ रुपये किंवा त्यापेक्षा जास्त किमतीचा रिचार्ज, सक्रिय असणे बंधनकारक आहे.
हा १५ रुपयांचा डेटा पॅक माय जिओ अ‍ॅप, जिओच्या अधिकृत संकेतस्थळावर, रिलायन्स डिजिटल स्टोअर्स, मोबाईल रिचार्ज दुकाने तसेच PhonePe, Google Pay आणि Paytm यांसारख्या डिजिटल पेमेंट अ‍ॅप्सद्वारे सहज रिचार्ज करता येतो. रिचार्ज करण्यापूर्वी ग्राहकांनी आपला क्रमांक या पॅकसाठी पात्र आहे की नाही, याची खात्री करून घेण्याचा सल्ला देण्यात आला आहे. पात्रता पूर्ण न झाल्यास पॅकचा लाभ मिळणार नाही. कमी खर्चात एका दिवसासाठी अनलिमिटेड 5G इंटरनेटची गरज असलेल्या ग्राहकांसाठी हा पॅक उपयुक्त पर्याय ठरू शकतो. मात्र, 5G फोन, 5G नेटवर्क आणि आवश्यक बेस प्लॅन नसल्यास या सुविधेचा लाभ घेता येणार नाही. त्यामुळे रिचार्जपूर्वी सर्व अटी तपासूनच हा पॅक सक्रिय करण्याचे आवाहन करण्यात आले आहे.
