मुंबई : मुंबईच्या रस्त्यावरून चालताना अनोळखी व्यक्तीसोबत बोलताना जरा काळजी घ्या. विशेषकरून महिला आणि वृद्धांनी. खबरदारी घेतली नाही तर कधीही चोरांच्या जाळ्यात अडकाल याचा नेम नाही. मुंबईत गेल्या आठवड्याभरात घडलेल्या घटनांवरून संभाषण कौशल्याचा वापर करून महिला आणि ज्येष्ठ नागरिकांना बोलता-बोलता फसविले जात असल्याचे समोर आले आहे. सांताक्रूझ, वाकोला, लोअर परळ, वांद्रे या ठिकाणी अशा घटनांमध्ये फसवणूक झाल्याप्रकरणी पोलिसांत तक्रारी दाखल करण्यात आल्या आहेत. सांताक्रूझ येथे बैठ्या चाळीमध्ये राहणाऱ्या ६५ वर्षीय चंद्रभागा या घराबाहेर कपडे वाळत घालत होत्या. एक तरुण त्यांच्याजवळ आला आणि चंद्रभागा यांच्यासोबत बोलू लागला. आमच्या शेठला मुलगा झाला असून तो गरीबांमध्ये साड्या आणि पैसे वाटप करीत असल्याचे तो म्हणाला. तुम्ही माझ्यासोबत चला असे सांगत तो चंद्रभागा यांना जवळच्या इमारतीमध्ये घेऊन गेला. शेठसमोर दागिने घालून जाऊ नका, असे म्हणत त्याने चंद्रभागा यांच्या गळ्यातील सोन्याची माळ आणि कर्णफुले काढून घेतली. काही वेळ थांबण्यास सांगून तो पसार झाला.
आनंद चौरसिया हा तरुण लोअर परळ परिसरातून दुचाकीवरून जात असताना एका तरुणाने त्याला थांबवून लिफ्ट मागितली. आनंद याने त्याला दुचाकीवर मागे बसवले. काही अंतर गेल्यावर मागे बसलेल्या तरुणाने हेल्मेटवर घाण पडली असल्याचे आनंद याच्या निदर्शनास आणून दिले. गाडी थांबवून आनंद याने या तरुणाच्या मदतीने हेल्मेट धुतले आणि पुढे निघाले. काही अंतरावर मागे बसलेला तरुण उतरला आणि नंतर आपल्या गळ्यातील सोन्याची चेन गायब असल्याचे आनंद याच्या लक्षात आले. वाकोला येथील ६३ वर्षीय शुभांगी बाजारमध्ये खरेदीसाठी चालल्या होत्या. एका दुकानासमोर काहीजण बिस्कीट वाटप करीत होते. त्यातील एकाने शुभांगी यांना थांबवून त्यांना एक पिशवी दिली. या पिशवीत त्या तरुणाने पाच ते सहा बिस्किटांचे पुडे दिले. काही वेळ शुभांगी यांना बोलण्यात गुंतविले आणि पिशव्यांची अदलाबदल करण्याच्या प्रयत्नात त्यांच्या अंगावरील माळ, बांगड्या, चेन हे दागिने कधी काढून घेतले त्यांनाच कळले नाही. तुम्ही जेष्ठ नागरिक आहात, तुम्हाला सरकारी योजनेचे पैसे मिळवून देतो, असे सांगून वांद्रे येथील ६५ वर्षीय यमुना यांना एक तरुण कडेश्वरी माता मंदिर मार्गावरील ट्रान्झिप्ट कॅम्प परिसरात घेऊन गेला. कर्णफुले काढून ठेवायला सांगून आपल्या ताब्यात घेतली. पाकिटातील साडेसात हजारही स्वतःकडे घेतले. यमुना यांना वाट पाहण्यास सांगून हा तरुण गायब झाला.