मुंबई : मुंबईकरांचा रोजचा लोकल प्रवास अधिक सुरक्षित करण्यासाठी पश्चिम रेल्वेने उपनगरीय रेल्वे मार्गावरील १ हजार ६१५ कोचमध्ये १२ हजार ४४६ व्हिडिओ सव्हॅलन्स सिस्टम (व्हीएसएस) सीसीटीव्ही बसविण्याचा निर्णय घेतला आहे. तर मध्य रेल्वेवर लोकलमध्ये व्हिडिओ सव्र्व्हेलन्स सिस्टम प्रणाली अंतिम करण्यात येत आहे. लोकलमधील महिला डब्बा आणि रेल्वे स्थानकांमध्ये यापूर्वीच सीसीटीव्ही लागले आहेत.
१२३ किमी लांबीच्या चर्चगेट-डहाणू उपनगरीय कॉरिडॉरवर चालणाऱ्या शटल ट्रेन्स व्यतिरिक्त, एसी आणि नॉन-एसी लोकल ट्रेन्सच्या सर्व डब्यांसाठी व्हीएसएसचा समावेश असणार आहे. ही प्रणाली मोटरमन कॅब आणि ट्रेन मॅनेजर्सवर देखील लक्ष ठेवेल. मध्य रेल्वे देखील सीएसएमटी-कर्जत/कसारा/पनवेल कॉरिडॉरवर धावणाऱ्या लोकलमध्ये व्हीएसएस बसविण्यात येणार आहे. याकरिता संबंधित विभागांकडून तपशील अंतिम केले जात आहेत. पश्चिम रेल्वेच्या सूत्रांनी सांगितले की, डब्यांमध्ये व्हीएसएसचा पुरवठा, स्थापना, चाचणी आणि कमिशनिंगसाठी निविदा मागवल्या आहेत. येत्या १८ ऑगस्ट रोजी निविदा उघडण्यात येणार आहे. त्यानंतर कंत्राटदार निश्चित करण्यात येणार आहे. कंत्राट दिल्यानंतर काम पूर्ण होण्याकरिता सुमारे आठ ते नऊ महिने लागणार आहेत. १२ हजार ४४६ कॅमेरे बसविण्यासाठी सुमारे ९७कोटी ३० लाखांचा खर्च येणार आहे.