विरार : दिवाळीच्या पार्श्वभूमीवर विरार पूर्वेतील चंदनसार परिसरात भरवस्तीत सुरू असलेल्या बेकायदेशीर फटाका कारखान्यावर गुन्हे प्रकटीकरण कक्ष-२ च्या पथकाने धाड टाकून मोठी कारवाई केली. या कारवाईत फटाके तयार करण्यासाठी वापरला जाणारा कच्चा माल आणि अन्य साहित्य असा सुमारे १२ लाख ९८ हजार रुपयांचा मुद्देमाल जप्त करण्यात आला असून तिघांविरुद्ध गुन्हा दाखल करण्यात आला आहे. विरार पूर्वेतील चंदनसार रोडवरील ‘जी. एम. बेव्हरेज’ कंपनीलगत असलेल्या ‘मर्चंट एंटरप्रायझेस’ या फटाक्यांच्या दुकानाच्या वरच्या मजल्यावर बेकायदेशीररीत्या फटाके तयार करून त्यांची विक्री दुकानातून केली जात असल्याची माहिती पोलिसांना मिळाली होती. त्यानुसार गुरुवारी सायंकाळी पोलिसांनी छापा टाकून कारखान्याचा पर्दाफाश केला. या प्रकरणी सुलतान मासुमअली मर्चंट (६५), सागर सुरेश पाष्टे (३९) आणि देवेंद्र अजय नाईक (३९) यांच्याविरुद्ध भारतीय न्याय संहिता २०२३ मधील कलम २८८, ३(५) तसेच स्फोटक पदार्थ कायदा १८८४ अंतर्गत गुन्हा दाखल करण्यात आला आहे.
छाप्यादरम्यान पोलिसांना कारखान्याच्या दोन्ही मजल्यांवर फटाके तयार करण्याचे काम सुरू असल्याचे आढळले. तेथे मोठ्या प्रमाणात स्फोटक रसायने, कच्चा माल आणि फटाके निर्मितीचे साहित्य सापडले, तर तब्बल १७ कामगार काम करत असल्याचेही उघड झाले. प्राथमिक तपासात नामांकित कंपन्यांच्या नावाखाली बनावट फटाके तयार केले जात असल्याचा संशय पोलिसांनी व्यक्त केला आहे. विशेष म्हणजे, हा कारखाना दाट लोकवस्तीच्या मध्यभागी सुरू असल्याने मोठा अपघात होण्याचा धोका निर्माण झाला होता. नियमांनुसार फटाक्यांचे उत्पादन मानवी वस्तीपासून दूर सुरक्षित ठिकाणी करणे बंधनकारक असतानाही येथे अत्यंत धोकादायक पद्धतीने काम सुरू होते. किरकोळ निष्काळजीपणामुळेही मोठा स्फोट किंवा आग लागून जीवितहानी होऊ शकली असती, असे पोलिसांनी सांगितले. या प्रकरणाचा पुढील तपास सुरू असून संबंधितांवर कठोर कायदेशीर कारवाई करण्यात येणार असल्याचे पोलिसांनी स्पष्ट केले.
