पुणे : राज्याच्या अर्थव्यवस्थेत पुण्याला महत्वाचे स्थान असून, येथील नागरिककरण वेगाने वाढत आहे. त्यामुळे येथील आव्हाने वाढत आहेत. महानगरातील आव्हाने पेलण्यासाठी पोलीस दलाचे आधुनिकरण केले जात असून कार्यपद्धतीत गुणात्मक बदल करण्यात आला आहे, असे मत उपमुख्यमंत्री व गृहमंत्री देवेंद्र फडणवीस यांनी व्यक्त केले. पुणे शहरात नव्याने बसविले जाणारे २२८० अत्याधुनिक सीसीटीव्ही कॅमेरे तसेच पुणे पोलीस दलातील ७ नवीन पोलीस ठाणी, पिंपरी पोलीस आयुक्तालयातील ४ त्यासोबतच मीरा भाईंदर येथील १ पोलीस ठाणे, बंडगार्डन पोलीस ठाण्याच्या नवीन इमारत तसेच पुणे आणि पिंपरी पोलीस आयुक्तयालयातील नवीन इमारतीस मान्यता देत त्यांच्या बांधकामाचे उद्घाटन फडणवीस यांच्या हस्ते झाले. त्यावेळी ते बोलत होते. यावेळी नागरी उड्डाण राज्यमंत्री मुरलीधर मोहोळ, खासदार प्रा. मेधा कुलकर्णी, आमदार सिद्धार्थ शिरोळे, भीमराव तापकीर, सुनील टिंगरे तसेच पुण्याचे पोलीस आयुक्त अमितेश कुमार, पिंपरीचे पोलीस आयुक्त विनयकुमार चौबे यांच्यासह वरिष्ठ अधिकारी उपस्थित होते.
फडणवीस म्हणाले, महिला, ज्येष्ठ नागरिक तसेच बालकांवरील अत्याचारप्रकरणात त्वरीत कारवाई करावी तसेच अमली पदार्थ तस्करांची पाळेमुळे खणणून काढण्याचे आदेश दिलेले आहेत. अमली पदार्थ तस्करीत पोलीस सामील असल्याचे आढळून त्याला थेट पोलीस दलातून बडतर्फ करण्यात येईल, असा इशारा त्यांनी यावेळी दिला. पोलीस दलाची रचना, मनुष्यबळ तसेच पायाभूत सुविधांबाबत आकृतीबंध १९६० मध्ये केला होता. त्यानंतर २०२३ मध्ये मी नवीन आकृतीबंध तयार केला. महिला, ज्येष्ठ, बालकांच्या तक्रारी सोडविण्यास प्राधान्य द्यावे. गुन्ह्यांची संख्या वाढली तरी चालेल. मात्र, सामान्यांना न्याय देणे महत्त्वाचे आहे. पोलीस दलाला आधुनिक सोयी सुविधा उपलब्ध करून देण्यात येत आहे. पोलिसांच्या कार्यपद्धतीत गुणात्मक बदल करण्यासाठी प्रयत्न सुरू आहे. गृहमंत्रीपद भूषविताना ४० हजार पोलीस कर्मचाऱ्यांची भरती करण्यात आली, हा एकप्रकारचा विक्रम आहे. सायबर गुन्हे वाढत आहे. चोरट्यांकडून सामान्यांची फसवणूक केली जाते. सायबर गुन्ह्यांची उकल करण्यासाठी महाराष्ट्र सायबर पोलीस दलाल अत्याधुनिक यंत्रणा उपलब्ध करून देण्यात आली आहे. अशा प्रकारची यंत्रणा देशात फक्त महाराष्ट्र पोलीस दलाकडे उपलब्ध असल्याचे देवेंद्र फडणवीस यांनी नमूद केले. पुणे शहरात वाहतूक समस्या दिवसेंदिवस जटील होत चालली आहे. वाहतूक समस्या सोडविण्यासाठी पुणे पोलिसांच्या वाहतूक शाखेत मोठे फेरबदल करण्यात येणार आहे. एक अतिरिक्त पोलीस आयुक्तांसह दोन पोलीस उपायुक्त वाहतूक शाखेची जबाबदारी सांभाळणार आहेत, अशी घोषणा फडणवीस यांनी केली.
