नागपूर : नागपूर शहर गुन्हे शाखेच्या घरफोडी विरोधी पथकाने कारवाई करत घरफोडी करणाऱ्या अट्टल गुन्हेगाराला अटक केली आहे. संदीप खेमचंद टेमरे (वय २७, रा. छिंदवाडा परिसर, दुंडा सिवनी, मध्यप्रदेश) असे अटक आरोपीचे नाव असून तो नागपुरात संशयास्पद फिरत असल्याची गुप्त माहिती पोलिसांना मिळाली होती. त्यानुसार नंदनवन–मानकापूर परिसरातून सापळा रचून त्याला ताब्यात घेण्यात आले.
तपासादरम्यान आरोपीकडून सोन्याचे दागिने, चांदीचे दागिने, ह्युंदाई कार, होंडा शाईन मोटारसायकल, मोबाईल फोन तसेच घरफोडीसाठी वापरलेली साधने असा एकूण सुमारे अकरा लाख बारा हजार सातशे तीस रुपयांचा मुद्देमाल जप्त करण्यात आला. आरोपीवर नंदनवन, कोराडी, सक्करदरा व मानकापूर पोलिस ठाण्यांतील मिळून सहा घरफोडी व वाहन चोरीचे गुन्हे उघडकीस आले आहेत. ही कारवाई पोलिस आयुक्त डॉ. रवींद्रकुमार सिंघल, सहपोलीस आयुक्त नवीनचंद्र रेड्डी, अपर पोलीस आयुक्त (गुन्हे) वसंत परदेशी व उपायुक्त (डिटेक्शन) राहुल माकणीकर यांच्या मार्गदर्शनाखाली गुन्हे शाखेच्या पथकाने केली. आरोपी हा अट्टल घरफोड्या असून नागपूरसह मध्यप्रदेश व छत्तीसगडमध्ये त्याच्यावर अनेक गुन्हे नोंद असल्याची माहिती पोलिसांनी दिली आहे.
