पुणे : गेल्या तीन महिन्यांपासून पुणे पोलिसांना गुंगारा देणारा एम. एम. टोळीचा म्होरक्या व ‘मकोका’तील फरारी आरोपी मंगेश अनिल माने उर्फ मंग्या (वय २६, रा. सरगम चाळ, बिबवेवाडी) याला कोंढवा पोलिसांनी अटक केली असून, त्याची कोंढवा परिसरातून धिंड काढली.
कोंढवा पोलिस ठाण्याचे वरिष्ठ निरीक्षक सोमनाथ सोनवणे यांनी दिलेल्या माहितीनुसार, २८ मार्च रोजी वर्चस्वाच्या वादातून आरोपी मंगेश माने, सागर जाधव, पवन राठोड, सुरज पाटील व अभिजीत दुधणीकर यांनी एकाला लोखंडी धारदार शास्त्राने मारहाण केली होती. यानंतर पोलिसांनी सागर जाधव, पवन राठोड, सुरज पाटील आणि अभिजित दुधणीकर यांना अटक केली होती; परंतु मुख्य आरोपी पोलिसांना गुंगारा देत होता. पोलिसांनी त्याच्या शोधासाठी पथके नेमली होती. आरोपी आणि त्याच्या मित्रांनी कोंढवा, बिबवेवाडी, भारती विद्यापिठ, मार्केट यार्ड या पोलिस ठाण्यांच्या हद्दीमध्ये मोठ्या प्रमाणात गाड्यांची तोडफोड करून टोळीची दहशद निर्माण केली होती. फरारी माने हा गोकुळनगरमधील पाण्याच्या टाकीजवळ येणार असल्याची माहिती समजताच कोंढवा पोलिसांनी सापळा रचून मानेला गजाआड केले. यानंतर त्यांची बेड्या घालून परिसरातून धिंड काढण्यात आली.