रेल्वे संरक्षण दलाच्या ( Railway Protection Force) इतिहासात प्रथमच एका महिला अधिकाऱ्याला सर्वोच्च पदाची सूत्रे सोपवण्यात आली आहेत. वरिष्ठ आयपीएस अधिकारी सोनाली मिश्रा यांची रेल्वे संरक्षण दलाच्या पहिल्या महिला महासंचालक (Director General) म्हणून नियुक्ती करण्यात आली आहे. रेल्वेच्या अधिकाऱ्यांनी यासंदर्भात माहिती दिली आहे. मध्य प्रदेश केडरच्या १९९३ च्या बॅचच्या भारतीय पोलिस सेवा (आयपीएस) अधिकारी सोनाली मिश्रा ३१ ऑक्टोबर २०२६ रोजी त्यांच्या निवृत्तीपर्यंत आरपीएफच्या महासंचालक पदावर कार्यरत राहतील. कार्मिक मंत्रालयाने जारी केलेल्या आदेशानुसार, मंत्रिमंडळाच्या नियुक्ती समितीने सोनाली मिश्रा यांची या पदावर नियुक्ती करण्यास मान्यता दिली आहे. येत्या ३१ जुलै रोजी निवृत्त होणारे महासंचालक मनोज यादव यांच्या जागी त्या पदभार स्वीकारतील. अधिकाऱ्यांनी सांगितले की, सोनाली मिश्रा या आरपीएफचे नेतृत्व करणाऱ्या पहिल्या महिला अधिकारी असतील. आरपीएफकडे इतर कर्तव्यांसह रेल्वे मालमत्तेची आणि प्रवाशांची सुरक्षा करण्याची जबाबदारी सोपवण्यात आली आहे. सध्या सोनाली मिश्रा मध्य प्रदेश पोलिसात अतिरिक्त महासंचालक म्हणून कार्यरत आहेत.
सोनाली मिश्रा यांची कारकीर्द
सोनाली मिश्रा यांनी त्यांच्या प्रतिष्ठित कारकिर्दीत अनेक महत्त्वाच्या भूमिकांमध्ये काम केले आहे. जुलै २०२१ मध्ये, पंजाबमधील भारत-पाकिस्तान सीमेवर सीमा सुरक्षा दलाच्या (BSF) फॉर्मेशनचे नेतृत्व करणाऱ्या पहिल्या महिला कमांडर म्हणून त्यांची नियुक्ती करण्यात आली. सोनल यांनी काश्मीर खोऱ्यात महानिरीक्षक (आयजी) म्हणून दलाच्या स्थापनेचे नेतृत्व केले. त्यांनी बीएसएफच्या गुप्तचर शाखेचेही नेतृत्व केले. त्यांनी बीएसएफमध्ये एडीजी म्हणूनही काम केले आहे. सोनाली यांना पीपीएमडीएस (विशिष्ट सेवेसाठी राष्ट्रपती पोलिस पदक) आणि पीएमएमएस (गुणवत्तेच्या सेवेसाठी पोलिस पदक) मिळाले आहे.
