मुंबई : कांदिवली पश्चिमेतील चारकोप परिसरात सुरू असलेल्या एका हायटेक बनावट कॉल सेंटरचा पोलिसांनी पर्दाफाश करत दोन आरोपींना अटक केली आहे. हे कॉल सेंटर ॲपल आणि ॲमेझॉनसारख्या नामांकित ई-कॉमर्स कंपन्यांचे कस्टमर केअर प्रतिनिधी असल्याचे भासवून परदेशी नागरिकांची फसवणूक करत असल्याचे तपासात उघड झाले. गुप्त माहितीच्या आधारे चारकोप पोलिसांनी २६ ऑक्टोबर २०२६ रोजी रात्री चारकोपमधील ॲक्मे एव्हेन्यू इमारतीतील एका फ्लॅटवर छापा टाकला. कारवाईदरम्यान आसिफ कुरेशी आणि समर्थ पी. या दोघांना अटक करण्यात आली. मात्र, या रॅकेटचे मुख्य सूत्रधार शाहरुख आणि सिमरन हे दोघे फरार असून त्यांचा पोलीस शोध घेत आहेत. या बनावट कॉल सेंटरमधून अत्याधुनिक तंत्रज्ञानाचा वापर करून परदेशातील नागरिकांना लक्ष्य केले जात असल्याची माहिती तपासात समोर आली आहे.
प्राथमिक तपासानुसार, फरार आरोपी ई-कॉमर्स प्लॅटफॉर्मवरील ग्राहकांच्या तक्रारींचा डेटा बेकायदेशीरपणे मिळवत होते. त्यानंतर कॉल सेंटरमधील ऑपरेटर्स संबंधित ग्राहकांना फोन करून स्वतःला कंपनीचे अधिकृत प्रतिनिधी असल्याचे सांगत. “तुमची ऑर्डर रद्द होईल”, “डिलिव्हरी होणार नाही” किंवा “तुमचे खाते बंद केले जाईल” अशी भीती दाखवून ग्राहकांकडून ऑनलाइन पैसे उकळले जात होते. या प्रकरणी चारकोप पोलीस ठाण्याचे हवालदार विजयकुमार सूर्यवंशी यांच्या तक्रारीवरून गुन्हा दाखल करण्यात आला आहे. या टोळीने आतापर्यंत किती परदेशी नागरिकांची फसवणूक केली आणि त्यांच्याकडून किती रकमेची उकळपट्टी केली, याचा सखोल तपास पोलीस करत आहेत. तसेच फरार आरोपींना अटक करण्यासाठी विविध ठिकाणी शोधमोहीम सुरू असून, या रॅकेटमागील इतर साथीदारांचाही शोध घेतला जात आहे.
