मुंबई : केवायसी अपडेट तसेच बँकांसंदर्भात कोणतेही व्यवहार करताना सावधगिरी बाळगा, असे आवाहन, जनजागृती पोलिसांमार्फत वारंवार केली जाते. मात्र पोलिसच अशा सायबर जाळ्यात अडकत असतील तर खेरवाडी पोलिस ठाण्यात कार्यरत असलेल्या एका निरीक्षकाला तब्बल पाच लाख रुपयांना गंडवण्यात आले आहे. या प्रकाराची तक्रार संबंधित निरीक्षकाला आपल्य़ाच पोलिस ठाण्यात करावी लागली आहे. खेरवाडी पोलिस ठाण्यात बुधवारी हे निरीक्षक कामावर हजर झाले. पोलिस ठाण्यात असतानाच त्यांना एका व्यक्तीचा फोन आला. त्याने निरीक्षकाला त्याच्या बँक खात्याचा तपशील देत तुमच्या खात्याची केवायसी अपडेट नसल्याचे सांगितले. केवायसी अपडेट नसल्याने तुमचे खाते स्थगित करण्यात आले असून, लवकरात लवकर केवायसी अपडेट न केल्यास खाते बंद केले जाईल, असे सांगण्यात आले. याच बँक खात्यामधून गृहकर्जाचा हप्ता जात असल्याने पोलिस निरीक्षकाने केवायसी अपडेट करण्याचा निर्णय घेतला.
केवायसी ऑनलाइन अपडेट करण्यासाठी भामट्याने त्यांना एक ॲप डाउनलोड करण्यास सांगितले. या ॲपवर जाऊन वैयक्तिक माहिती आणि बँक खात्याचा तपशील भरण्यास सांगण्यात आले. ही माहिती भरल्यानंतर कस्टमर केअरवर संपर्क करण्यास सांगून एक मोबाइल क्रमांक दिला. निरीक्षकाने या क्रमांकावर संपर्क साधला असता तो बंद येत होता. काही वेळाने याच क्रमांकवरून व्हिडीओ कॉल आला. त्याने ॲपवर भरलेली माहिती देण्यास सांगून केवायसी अपडेटसाठी मोबाइलवर आलेले ओटीपी मागितले. निरीक्षकाने तीन ओटीपी दिले आणि त्यानंतरही ही प्रक्रिया सुरूच ठेवल्याने त्यांना संशय आला आणि त्याने फोन बंद केला. त्यानंतर बँकेतील जमा रक्कम तपासत असताना पाच लाख रुपये काढण्यात आल्याचे लक्षात आले. निरीक्षक कार्यरत असलेल्या खेरवाडी पोलिस ठाण्यातच त्याच्या तक्रारीवरून गुन्हा दाखल करण्यात आला आहे.
