मुंबई : केंद्रीय निवडणूक आयोगाने (ECI) महाराष्ट्रातील मतदार यादीच्या विशेष सखोल पुनरीक्षण (SIR) मोहिमेला मुदतवाढ देण्याचा महत्त्वाचा निर्णय घेतला आहे. सुधारित वेळापत्रकानुसार, राज्याची अंतिम मतदार यादी आता २२ डिसेंबर २०२६ रोजी प्रसिद्ध केली जाणार आहे. यापूर्वी ही यादी ३० नोव्हेंबरला जाहीर होणार होती. निवडणूक आयोगाचे अवर सचिव संदीप कुमार यांनी १८ नोव्हेंबर रोजी यासंदर्भातील आदेश जारी करून महाराष्ट्रासह दिल्ली, तेलंगणा, आंध्र प्रदेश, नागालँड, हरियाणा आणि झारखंड या सहा राज्यांच्या मुख्य निवडणूक अधिकाऱ्यांना सुधारित वेळापत्रकाची माहिती दिली आहे. विशेषतः अनुपस्थित, स्थलांतरित, मृत किंवा दुबार (ASDD) मतदारांच्या नोंदींची अचूक पडताळणी करण्यासाठी ही अतिरिक्त मुदत देण्यात आली आहे. या निर्णयामुळे मतदार यादी अधिक अचूक आणि पारदर्शक करण्यास मदत होणार असल्याचे आयोगाने स्पष्ट केले आहे. तसेच मतदान केंद्रस्तरीय अधिकारी (BLO) यांना प्रत्यक्ष पडताळणीचे काम पूर्ण करण्यासाठी आणि नागरिकांना आवश्यक दुरुस्त्या करण्यासाठी अधिक वेळ उपलब्ध होणार आहे.
सुधारित वेळापत्रकानुसार, गणना अर्जांची निर्मिती आणि छपाईचे काम १८ नोव्हेंबरपर्यंत पूर्ण करण्यात येणार आहे. त्यानंतर १८ नोव्हेंबर ते ३० नोव्हेंबर या कालावधीत ASDD मतदारांसाठी अर्जांचे वितरण आणि संकलन केले जाईल. प्राप्त अर्जांची छाननी करून दावे आणि हरकतींची सुनावणी १० ते १५ डिसेंबरदरम्यान पूर्ण केली जाणार आहे. त्यानंतर सर्व प्रक्रिया पूर्ण झाल्यावर २२ डिसेंबर २०२६ रोजी अंतिम मतदार यादी प्रसिद्ध करण्यात येईल. या मुदतवाढीमुळे नागरिकांना मतदार यादीत नाव समाविष्ट करणे, चुकीची माहिती दुरुस्त करणे, पत्ता बदल नोंदवणे किंवा हरकत दाखल करण्यासाठी अतिरिक्त वेळ मिळणार आहे. तसेच निवडणूक यंत्रणेलाही मतदार नोंदींची अधिक प्रभावी पडताळणी करता येणार आहे. निवडणूक आयोगाच्या या निर्णयामुळे मतदार यादीतील त्रुटी कमी होण्यास मदत होईल आणि आगामी निवडणुकांसाठी अधिक विश्वासार्ह व अचूक मतदार यादी तयार करण्याच्या प्रक्रियेला बळ मिळेल.

