मिरा-भाईंदर : मिरा-भाईंदर महापालिकेने उद्यानांच्या जागेत तरणतलाव उभारण्यासाठी स्वतःच लावलेल्या तब्बल तीन हजार झाडांवर कुऱ्हाड चालवण्याचा घाट घातला आहे. या झाडांचे अन्य ठिकाणी पुनर्रोपण करण्याचा दावा केला जात असला, तरी प्रत्यक्षात ते अशक्य असून ही केवळ धूळफेक असल्याचे मत व्यक्त करत, पर्यावरणप्रेमींनी प्रशासनाच्या कारभारावर नाराजी व्यक्त केली आहे. मिरा-भाईंदरमधील हरित पट्ट्यात वाढ करण्याच्या उद्देशाने मागील तीन वर्षांत उद्यानांच्या आरक्षित जागेवर हजारो झाडे लावण्यात आली आहेत. खासगी संस्थांच्या मदतीने हे काम महापालिकेकडून करण्यात आले आहे. यात मिरा रोडच्या रामदेव पार्क येथील आरक्षित जागेतील झाडांचाही समावेश आहे. आता येथील ६०७ मोठी, तर दोन हजार ६६० लहान अशी एकूण तीन हजार २६७ भारतीय प्रजातींची झाडे मुळासकट काढून त्यांचे इतरत्र पुनर्रोपण करण्याचा विचार केला जात आहे. महापालिकेने त्यासाठी नोटीस बजावत, नागरिकांकडून हरकती व सूचना मागवल्या आहेत.
शहराच्या विविध भागांत तरणतलाव विकसित करण्यासाठी महापालिकेला राज्य सरकारने निधी मंजूर केला आहे. याच निधीतून उद्यानात झाडे लावलेल्या जागेतच मोठ्या आकाराचे तरणतलाव विकसित करण्याच्या दृष्टीने पालिकेकडून ही कार्यवाही केली जात आहे. परंतु, यापूर्वीची अनेक उदाहरणे लक्षात घेता, सर्वच झाडांचे पुनर्रोपण करणे अश्यक्य आहे तसेच तशी योग्य जागादेखील पालिकेकडे उपलब्ध नाही. यावर मोठा खर्च होईल, याकडेही पर्यावरणप्रेमींनी लक्ष वेधले आहे. त्यामुळे झाडांचे पुनर्रोपण करण्याच्या नावाखाली त्यांच्यावर कुऱ्हाड चालवण्याचा महापालिकेचा हा घाट असल्याचा आरोप करत पर्यावरणप्रेमींनी केला आहे. मिरा-भाईंदरवासींना सद्यस्थितीत तरणतलावांची नव्हे, तर झाडांची सर्वाधिक गरज असल्याचे मत व्यक्त होत आहे. त्यामुळे तरणतलावांसाठी वृक्षतोडीचा निर्णय तात्काळ मागे घेण्याची मागणी केली जात आहे.
महापालिकेच्या उद्यानातील झाडांचे इतरत्र पुनर्रोपण करण्यासाठी नोटीस जारी करण्यात आली आहे. त्यावर नागरिकांच्या केवळ हरकती व सूचना मागवण्यात आल्या आहेत. त्यावर सुनावणी घेत, नंतर योग्य तो अंतिम निर्णय घेतला जाणार आहे.- कल्पिता पिंपळे, उपायुक्त, मिरा-भाईंदर महापालिका