ईडीही १६४ कोटींच्या खंडणीप्रकरणी गुन्हा दाखल करण्याची शक्यता

काही दिवसांपूर्वी ताराचंद वर्मा यांनी वांद्रे पोलीस ठाण्यात सर्व आरोपींविरुद्ध तक्रार दाखल केली होती. त्यानुसार ६ जानेवारीला एका आरोपीने त्यांना दूरध्वनी केला होता. त्यानंतर १० जानेवारीला वांद्रे येथील एका कॉफी शॉपमध्ये बैठक झाली. त्याचवेळी, एका आरोपीने ताराचंद वर्मा यांना ईडीचा अधिकारी असल्याचा खोटा दावा केला. तसेच दुसऱ्या बांधकाम व्यावसायिकासोबत झालेल्या व्यवहाराबाबत १६४ कोटी रुपयांच्या तडजोड करण्याची धमकी दिली. ताराचंद वर्मा यांना खंडणीची रक्कम द्यायची नसल्याने या प्रकरणी तक्रार केली. त्यानुसार वांद्रे पोलीस ठाण्यात गुन्हा दाखल करून याप्रकरणाचा तपास गुन्हे शाखेला वर्ग करण्यात आला. ताराचंद वर्मा यांनी तक्रार दाखल केल्यानंतर बैठक झालेल्या कॉफी शॉपमधील सीसीटीव्ही चित्रीकरण तपासण्यात आले. यामध्ये ताराचंद वर्मा यांना धमकावत असलेल्या आरोपींची माहिती गुन्हे शाखेला मिळाली. त्यानंतर या सीसीटीव्ही चित्रीकरणाच्या माध्यमातून आरोपींची ओळख पटवत रविवारी चौघांना तर सोमवारी एकाला गुन्हे शाखेने ताब्यात घेतले. तर सहाव्या आरोपीला नुकतीच गुन्हे शाखेने अटक केली. याप्रकरणी आता ईडीही प्राथमिक चौकशी करत असून याप्रकरणी गुन्हा दाखल करण्याच्या प्रक्रियेला सुरूवात केल्याचे सूत्रांनी सांगितले.