वृत्तसंस्था : ‘बिग बॉस मराठी ५’मुळे घराघरांत पोहोचलेला अभिनेता म्हणजे सूरज चव्हाण. शोमध्ये त्याला सुरुवातीला खेळ कळला नाही; मात्र नंतर तो या शोच्या विजेता झाला होता. ‘बिग बॉस मराठी ५’नंतर त्यानं ‘झापुक झुपूक’ नावाचा सिनेमादेखील केला. त्यानंतर आता त्याला दाक्षिणात्य सिनेसृष्टीत काम करायचं आहे. अशी इच्छा त्यानं स्वत:च व्यक्त केलीय.
‘बिग बॉस मराठी ५’च्या महाअंतिम सोहळ्यात सूरज चव्हाण विजयी होताच दिग्दर्शक केदार शिंदे यांच्याकडून एक घोषणा करण्यात आली, ती म्हणजे त्याला घेऊन चित्रपट करणार असल्याची. ‘बिग बॉस मराठी ५’च्या महाअंतिम सोहळ्यात केदार शिंदेंनी त्याला घेऊन ‘झापुक झुपूक’ चित्रपट करणार असल्याची घोषणा केली. सूरजचा हा ‘झापुक झुपूक’ सिनेमा म्हणावा तितका यशस्वी झाला नाही. पण त्याच्या अभिनयाचं अनेकांनी कौतुक केलं. यानंतर आता सूरजनं दाक्षिणात्य सिनेमात काम करायचं असल्याची इच्छा व्यक्त केली. नुकत्याच एका मुलाखतीत त्यानं याबद्दल प्रतिक्रिया दिली.
